За да не се губат часови, учениците треба за еден час, колку што им е потребно да се вратат во нивните домови, да се приклучат онлајн за да ја следат наставата, препорача Министерството за образование и наука
Во деновите кога ќе добијат заканувачка порака за поставена бомба во нивниот објект, училиштата да организираат онлајн настава, односно учење на далечина, наместо целосно да ја прекинуваат наставата тој ден.
За да не се губат часови, учениците треба за еден час, колку што им е потребно да се вратат во нивните домови, да се приклучат онлајн за да ја следат наставата.
Ова е една од препораките кои Министерството за образование и наука (МОН) ги испратило до директорите на основните и средните училишта во земјава кои изминативе месеци во континуитет добиваат лажни дојави за поставени бомби во нивните објекти, што освен паника кај учениците и професорите, доведува и до прекин на наставата.
Во дописот кој МОН го испратил до основните и средните училишта биле посочени и начини за користење на електронските адреси и насоки за зајакнување на контролата за влез и излез во училиштата.
Скопската полиција денеска евакуира 14 школи во главниот град откако на нивните електронски адреси добиле заканувачки пораки за поставени бомби.
Со дојавите за бомби вчера беа опфатени рекорден број училишта.
Закани добија вкупно 86 школи, една градинка и Заводот за рехабилитација во Скопје, како и едно училиште во Прилеп. По проверките, за сите беше утврдено дека се лажни.