Нема потреба од грижи за наводно преземање на некакви бази на податоци на граѓаните, затоа што на веб-страната не постојат такви позадински бази и таа има информативен карактер, велат од Министерството за образование и наука
Откако утринава веб-страницата на Министерството за образование и наука беше урната од хакерски напад, зад кој наводно стојат грчки хакери кои се претставуваат како „Netwatchers“, „360 степени“ побара одговори од министерството и од ресорниот министер Јетон Шакири.
Од МОН ни одговорија дека се работи на пронаоѓање на изворот на нападите и на зајакнување на безбедноста на веб-страницата, по што се очекува таа повторно да биде активирана.
„Министерството за образование и наука е во комуникација со Националниот ЦИРТ центар за компјутерски инциденти при Агенцијата за електронски комуникации каде што е пријавен случајот и од каде очекуваме, со поддршка на МВР, да се преземат конкретни активности за пронаоѓање на локацијата и изворот на нападите. Во меѓувреме, ИТ-службата на МОН, со поддршка од надворешни соработници, презема дејствија за зајакнување на безбедноста на веб-страницата, по што повторно ќе биде активирана. Нема потреба од грижи за наводно преземање на некакви бази на податоци на граѓаните, затоа што на веб-страната не постојат такви позадински бази и таа има информативен карактер“,
се вели во соопштението од МОН.
Mинистерот Јетон Шакири, во телефонски разговор ни кажа дека е запознаен со ситуацијата но и дека не може да ни каже поконкретни детали бидејќи во моментот се наоаѓа надвор од државата.
Инаку, министерството беше мета на хакерски напади и во февруари годинава. Тогаш, грчки хакери објавија дека презеле контрола врз надзорните камери и базите на податоци во министерството. Тогаш МОН ги демантираше овие објави.