Според полицијата, тој континуирано предизвикувал пожари во населените места Њивице, Жвиње, Суторини, Подима, Камен, Мокрина, Ситница, Зеленица и Кумбор
Полицијата во Херцег Нови уапси деветнаесетгодишно момче, поради сомнение дека подметнал десет пожари на територијата на таа општина.
Според црногорските медиуми, ова момче се сомничи дека од 24 јули до 8 август сторило кривично дело „предизвикување општа опасност“, на тој начин што во десет наврати подметнувал пожари, палејќи ниска и висока вегетација по регионалните патишта, поради што, како што информираат од полицијата, настанала поголема материјална штета, пренесува Вијести.
Според нив, тој континуирано предизвикувал пожари во населените места Њивице, Жвиње, Суторини, Подима, Камен, Мокрина, Ситница, Зеленица и Кумбор.
Против него е поднесена кривична пријава и ќе биде изведен пред државниот обвинител во Основното државно обвинителство во Котор.
„Во локализирањето на споменатите пожари, покрај Службата за заштита и спасување Херцег Нови, активно учествуваа и службеници од Дирекцијата за вонредни состојби и Армијата на Црна Гора, кои со воздушна поддршка ги изгаснаа пожарите во Живиње и околните села на Херцег Нови. . Значајно е да се истакне дека во наведениот период, при преземање активности во надлежност на полицијата, постигната е одлична соработка и континуирана размена на податоци со припадниците на Службата за заштита и спасување Херцег Нови, како и со граѓани , со цел сеопфатно разрешување на предметните настани“,
се наведува во соопштението на Полициската управа.
Неколку дена им беа потребни на пожарникарите да се справат со пожарот кај Њивице. Ситуацијата беше и критична, бидејќи пожарот го преминал патот и се проширил кон населбата. Притоа изгорела една напуштена зграда, а пожарот беше закана за повеќе од 15 куќи. Две куќи биле во непосредна опасност од пожар, но тие биле спасени благодарение на реакцијата на пожарникарите.