Дел од петмина бугарски државјани на кои им било забрането да влезат во земјава на 6 мај, биле и лица за кои Министерството за внатрешни работи (МВР) имало сознанија оти претставуваат ризик по јавниот ред и безбедност. Сепак, од МНР додаваат оти европратеникот Ковачев не е еден од нив, но надлежните служби донеле одлука да му го забранат влезот и нему поради групата со која патувал
Секој европратеник кој го почитува достоинството на државата и нејзините граѓани е добредојден во Северна Македонија, вели Министерството за надворешни работи (МНР) во пишаната изјава за медиумите откако бугарскиот европратеник Андреј Ковачев претходно денеска побара официјално Скопје да му ја образложи причината поради која на 6 мај му беше забрането да влезе во земјава.
Во образложението за таквата одлука, од МНР велат дека дел од петмина бугарски државјани на кои им било забрането да влезат во земјава на 6 мај, биле и лица за кои Министерството за внатрешни работи (МВР) имало сознанија оти претставуваат ризик по јавниот ред и безбедност.
Сепак, од МНР додаваат оти европратеникот Ковачев не е еден од нив, но надлежните служби донеле одлука да му го забранат влезот и нему поради групата со која патувал.
„Во таа насока, на 6 мај, на граничниот премин ‘Ново Село’, ‘поради неисполнување на условите за влез во Република Северна Македонија, согласно законот за странци, не било дозволен влез на група од петмина државјани на Република Бугарија’“,
се вели во соопштението на МНР.
Реакцијата на МНР следува откако претходно денеска бугарскиот европратеник Андреј Ковачев во изјава за БТВ кажа дека Северна Македонија ја преминала црвената линија со тоа што како земја кандидат за членство во Европската Унија не дозволила влез на европратеник на нејзината територија.
Ваквиот потег на С Македонија, рече Ковачев, секако ќе влијае на нејзините преговори за членство во ЕУ.
„Пред да зборуваме за ново вето, не само од Бугарија туку и од Европската Унија, за ова прво мора да се слушне објаснување од Скопје“,
изјави бугарскиот европратеник.
Македонската гранична полиција во саботата не им дозволи влез во земјата на бугарскиот европратеник од ГЕРБ, Андреј Ковачев, како и на Милен Врабески и уште тројца Бугари, кои како и секоја година тргнале да учествуваат на панихидата за починатите на бугарските воени гробишта во струмичко Ново Село.
Ваквиот потег наиде на осуда од еврокомесарот за проширување и добрососедска политика Оливер Вархеји и од лидерот на Европската народна партија (ЕПП), Манфред Вебер.
Претходно реакција стигна и од партијата на Борисов – ГЕРБ, од каде што соопштија дека за случајот ќе ги известат европските партнери и комесарот за проширување Оливер Вархеји. Од партијата рекоа дека станува збор за недозволиви мерки кои ги спровеле властите во Северна Македонија.
Во саботата реагираа од бугарското Министерство за надворешни работи, од каде што наведоа дека се разочарани од одлуката на властите во Северна Македонија да не им се дозволи влез во земјата на бугарскиот пратеник во Европскиот парламент, Андреј Ковачев, на претседателот на Фондацијата „Бугарска меморија“, Милен Врабевски, и на уште тројца бугарски државјани.
Македонското МВР викендов потврди дека на петмина бугарски државјани не им бил дозволен влез во земјава бидејќи не ги исполнувале условите според Законот за странци. Во објаснувањето од полицијата се наведува дека лица што ги навредуваат граѓаните и државата немаат право да влезат во земјава.