Доцна попладнево Европскиот парламент ќе одржи пленарна седница во Стразбур, на која според „Еуроњуз Бугарија“ ќе биде отворена и расправа во врска со тоа што на европратеникот од редовите на ГЕРБ и на уште четворица бугарски државјани не им беше дозволен влез во земјава на 6 мај
Европскиот парламент вечерва на пленарна сесија ќе расправа за случајот со европратеникот Андреј Ковачев кому во саботата не му бил дозволен влез во С Македонија, пишува „Еуроњуз Бугарија“. Состанокот, како што наведува медиумот, е закажан за 18 часот по бугарско, односно за 17 часот по македонско време.
За попладнево, според интернет-страницата на Европскиот парламент, е закажана пленарна седница на ЕП во Стразбур, но на дневен ред како посебна точка не е наведено ова прашање.
Лидерот на Европската народна партија (ЕПП), Манфред Вебер, во објава на својот твитер-профил забраната за влез на Ковачев во земјава ја оцени како неприфатлива и како случај без преседан. Тој ја повикува Владата на РС Македонија итно да ја разјасни ситуацијата.
„Цврсто го осудуваме одбивањето за влез на европратеникот Андреј Ковачев на 6 мај во Северна Македонија. Тоа е без преседан и едноставно неприфатливо. Ја повикуваме Владата на Северна Македонија итно да ја разјасни ситуацијата и по попладнево ќе го покренеме прашањето на пленарна седница“,
напиша лидерот на ЕПП на Твитер.
We firmly condemn the denial of entry of MEP @andreykovatchev on the 6th of May to North Macedonia. It is unprecedented and simply unacceptable. We call on the government of North Macedonia to urgently clarify the situation and will raise the matter in plenary this afternoon.
— Manfred Weber (@ManfredWeber) May 8, 2023
Со слична реакција и порака на социјалната мрежа се огласи и еврокомесарот за проширување и добрососедска политика Оливер Вархеји.
Тој на својот официјален твитер-профил напиша:
„Го осудуваме одбивањето за влез на европратеникот Андреј Ковачев во Северна Македонија на 6 мај. Ја повикуваме Владата на Северна Македонија итно да ја разјасни ситуацијата. Одбивањето за влез на член на Европскиот парламент е многу сериозна одлука“,
напиша еврокомесарот Вархеји на Твитер.
We condemn the denial of entry of MEP @andreykovatchev to North Macedonia on the 6th May.
— Oliver Varhelyi (@OliverVarhelyi) May 8, 2023
We call on the government of North Macedonia to urgently clarify the situation. The denial of entry of a Member of European Parliament is a very serious decision.
Македонската гранична полиција во саботата не им дозволи влез во земјата на бугарскиот европратеник од ГЕРБ, Андреј Ковачев, како и на Милен Врабески и уште тројца Бугари, кои како и секоја година тргнале да учествуваат на панихидата за починатите на бугарските воени гробишта во струмичко Ново Село.
Тој во изјава за БГНЕС рече дека е крајно изненаден од случајот и дека само неколку дена претходно се сретнал со министерот за надворешни работи Бујар Османи, како и дека тие, ГЕРБ и лидерот на партијата Бојко Борисов, прават сè што е можно за да се ослободи патот за Република Северна Македонија кон ЕУ.
Реакција вчера стигна и од партијата на Борисов – ГЕРБ, од каде што соопштија дека за случајот ќе ги известат европските партнери и комесарот за проширување Оливер Вархеји. Од партијата рекоа дека станува збор за недозволиви мерки кои ги спровеле властите во Северна Македонија.
Во саботата, реагираа од бугарското Министерство за надворешни работи, од каде што наведоа дека се разочарани од одлуката на властите во Северна Македонија да не им се дозволи влез во земјата на бугарскиот пратеник во Европскиот парламент, Андреј Ковачев, на претседателот на Фондацијата „Бугарска меморија“, Милен Врабевски, и на уште тројца бугарски државјани.
Македонското МВР викендов потврди дека на петмина бугарски државјани не им бил дозволен влез во земјава бидејќи не ги исполнувале условите според Законот за странци. Во објаснувањето од полицијата се наведува дека лица кои ги навредуваат граѓаните и државата немаат право да влезат во земјава.
„Македонската полиција нема да дозволи, ниту сега ниту во иднина, никој да го нарушува јавниот ред и мир и да ги навредува и омаловажува граѓаните и државата и нема да биде дозволен влез на такви лица на територија на државата“,
соопшти МВР.
Настанот на кој требало да учествуваат Ковачев и Врабевски е панихида во Ново Село по повод празникот Ѓурѓовден. Од бугарското МНР вчера соопштија дека настанот со години традиционално се организира во Струмица од страна на Амбасадата на Република Бугарија во Скопје, Генералниот конзулат на Бугарија во Битола и Фондацијата „Бугарска меморија“.