Во реакцијата од МНР се вели дека станува збор за рамковен договор, а од понудувачите е побарано цената да биде дефинирана за изнајмување по ден и по возило. Ова, според нив, значи дека само откако ќе се исцрпат сите домашни институционални капацитети и достапни возила, ќе се изнајмат одреден број возила кои недостасуваат
Министерството за надворешни работи (МНР) со писмено соопштение реагира на, како што велат оттаму, сите шпекулации кои се појавија во врска со набавката на возила за потребите на високите делегации кои ќе пристигнат во земјата за Министерскиот совет на ОБСЕ.
Од МНР во реакцијата велат дека не е точно оти Министерството ќе потроши преку 900 илјади евра, како што се тврди во медиумите за изнајмување возила.
„Станува збор за рамковен договор, а од понудувачите е побарано цената да биде дефинирана за изнајмување по ден и по возило. Ова значи дека само откако ќе се исцрпат сите домашни институционални капацитети и достапни возила, ќе се изнајмат одреден број возила кои недостасуваат. Министерството интензивно планира и обезбедува возила од институциите, но заради стандардите кои се предвидени од ОБСЕ, нужно е да има резервна опција доколку истите не се обезбедат“,
наведуваат од МНР.
Согласно досегашната анализа, од Министерството велат дека веќе половина од потребните возила се потврдени и ќе бидат обезбедени од институциите, а тоа според нив значи дека ни одблиску нема да се потроши планираниот буџет од Рамковниот договор. Предвидувањата се, велат од МНР, дека нема да се потрошат ни половина средства од финансиската рамка.
„Понудените цени се цени кои ги дефинира понудувачот. Заради ниската достапност на возилата со потребната спецификација во толкав број, веројатноста цената на истите да биде повисока во понудата е очекувана. Наша цел е да обезбедиме што повеќе возила од институциите и на тоа интензивно се работи, но апсолутно е нужно да имаме поддршка од професионална компанија за оној дел кој ќе недостастува. Станува збор за возила со специфични карактеристики, опрема и перформанси кои институциите ги немаат во доволен број, покрај ВИП-возилата, ескортни возила, мини ван возилата и автобуси“,
додаваат од МНР.
Министерската конференцијата на ОБСЕ, според МНР, преставува најголемиот надворешнополитички настан што кога било е организиран во земјава. Се очекува во Скопје да пристигнат над 70 делегации со приближно 1 000 членови на делегациите на највисоко ниво, но и дополнително високи претставници од бројни меѓународни организации.
„Сметаме дека е недозволиво да не се исполнат стандардите и да не се одговори на обврските кои произлегуваат од обврските за организирање на Министерскиот совет на ОБСЕ“,
се вели во реакцијата од МНР.