Порталот „МКД.мк“ вчера објави дека камион управуван од возач со македонски пасош бил запрен на влез во Италија од Словенија и при проверката било утврдено дека се шверцуваат цигари и алкохолни пијалаци
Министерството за надворешни работи (МНР) тврди дека досега нема потврда за злоупотребување на дипломатска пратка, откако во медиумите излегоа информации дека во камион со кој се пренесувала дипломатска пратка биле шверцувани цигари и алкохол.
„Дозволете да информираме дека во рамките на МНР е дадена насока на нашите служби да ја прегледаат целата документација, да се проверат сите информации од страна на дипломатско конзуларните претставништва, со цел проверка на ваквите наводи. Според првичните информации добиени во изминативе два дена, не е најдена никаква трага во Министерството, за евентуална пратка која би можела да биде основа за злоупотреба“,
велат од МНР.
Исто така, по насоки од Министерството дипломатско-конзуларните претставништва ќе треба да ги проверат сите информации за приведени наши граѓани во странство и дали нивните случаи се слични со објавените информации за шверц. Но, засега, како што потенцираат од МНР, од дипломатските претставништва не е добиена информација за некаков сличен случај.
„Иако нема потврда за постоење на ваков случај, Министерството има политика на нулта толеранција за злоупотреба или евентуално фалсификување на дипломатски документи или документи на институцијата, и оттука, МНР во следниот период ќе продолжи со темелни проверки на појавените наводи и за тоа соодветно ќе ја информира јавноста“,
додаваат од МНР.
Порталот „МКД.мк“ вчера објави дека камион управуван од возач со македонски пасош бил запрен на влез во Италија од Словенија и при проверката било утврдено дека се шверцуваат цигари и алкохолни пијалаци. Според изворот на кој се повика порталот, возачот при рутинските гранични формалности покажал документи што потврдувале дека се превезува дипломатска пошта. Но се чини дека нешто не се совпаѓало во документацијата, па поради сомнеж бил активиран скенерот на граничниот премин и потоа бил извршен претрес, што вообичаено не се прави кога станува збор за дипломатска пошта.
Сличен случај, пишува „МКД.мк“, имало и летово.