Беса засега не може да официјализира посебна пратеничка група во Собранието, со оглед на тоа што за тоа се потребни најмалку пет пратеници, колку што ќе има ако кон оваа ПГ, на пример, се приклучи Мендух Тачи
Лавина шпекулации предизвика денеска дописот што пратениците на Беса го испратиле до спикерот Талат Џафери за да го информираат дека во иднина четворицата пратеници на партијата ќе дејствуваат во парламентот одвоено од пратеничката група на коалицијата „Можеме“, предводена од СДСМ.
На дописот до Џафери, кој бил архивиран во парламентот на 17 септември, се потпишани Биљал Касами, Кастриот Реџепи, Фадиљ Зендели и Бастри Бајрами. Тие го известуваат спикерот дека од 14 септември дејствуваат како „група пратеници“ на Движењето Беса.
Пратеникот Реџепи, во изјава за „360 степени“, потврди дека пратениците на Беса во иднина ќе дејствуваат независно од СДСМ во парламентот, ама, како што вели, тоа не значи дека има несинхронизираност во владината коалиција.
Сепак, Беса засега не може да официјализира посебна пратеничка група во парламентот, со оглед на тоа што за тоа се потребни најмалку пет пратеници, колку што ќе има ако кон оваа ПГ, на пример, се приклучи Мендух Тачи
„Тоа го направивме во координација со коалициските партнери, за поголема ефикасност и полесна координација. Коалицијата не е доведена во прашање. Засега ќе функционираме како група на пратеници, со можност во иднина да прераснеме во пратеничка група“,
ни изјави Реџепи.
Од кабинетот на Џафери минатата седмица испратија известување дека овој собраниски состав почнува со работа со четири пратенички групи на „Можеме“, на коалицијата на ВМРО-ДПМНЕ, на ДУИ и на коалицијата Алијанса за Албанците – Алтернатива. За „Можеме“ беше посочено дека брои 46 пратеници, но сега ќе биде сведена на 42, со оглед на независниот настап на Беса. ПГ на ВМРО-ДПМНЕ, според евиденцијата на Џафери, брои 44 члена, а на ДУИ – 14, затоа што претседателот на парламентот не се смета за дел од ПГ. Четвртата ПГ на Алијанса -Алтернатива брои 12 члена. Надвор од пратенички групи остануваат Левица и ДПА, со по двајца, односно еден пратеник, а сега и Беса.
На предвремените парламентарни избори, Беса настапи во коалиција со СДСМ и партијата сега има еден министер во Владата – Адријанит Хоџа во земјоделство.
И досега во парламентот имало случаи кога една предизборна коалиција ќе се подели на повеќе пратенички групи, доколку некои од партиите кои се дел од неа успеат да соберат пет пратеници за формирање ПГ. Во еден од минатите состави таков беше случајот со НСДП и ЛДП, кои заедно направија ПГ и се одделија од ПГ на тогаш опозицискиот СДСМ, ама и натаму останаа во коалиција.
Во минатиот собраниски состав, пак, ВМРО-ДПМНЕ формираше десет пратенички групи од редовите на коалицијата, која тогаш влезе во парламентот со 51 пратеник. Но, тој модел се покажа како нефункционален кон крајот на 2018 година, откако дел од пратениците од коалицијата преминаа или се приклучија кон владејачкиот табор. Тогаш, новото раководство на ВМРО-ДПМНЕ реши да ги укине десетте пратенички групи и „преостанатите“ пратеници да се соберат во една ПГ.
Инаку, во овој собраниски состав, за почеток, освен четири пратенички групи, има претставници на вкупно 16 партии, а засега само Игор Дурловски, кој беше носител на листата на ВМРО-ДПМНЕ во петтата ИЕ, се води како независен.
На тој список на независни пратеници првично се најдоа и Исмаил Јахоски и Панчо Минов, ама, според последните информации од собраниската интернет-страница, тие се „вратени“ во пратеничките групи на ДУИ и на СДСМ. Минов, кој во претходниот собраниски состав беше пратеник на ГРОМ, сега фигурира како пратеник на СДСМ.
