Изјавата на премиерот следува откако новиот премиер на Унгарија, Петер Маѓар, најави оти ќе го истражуваат кредитот од една милијарда евра за Македонија, кој на земјава ѝ го одобри претходната унгарска влада во 2024 година
Откако унгарскиот премиер Петер Маѓар најави истрага за кредитот од една милијарда евра, кој земјава го доби преку унгарската државна банка „Ексимбанка“, наведувајќи оти каматната стапка по која Унгарија ѝ го дала кредитот на Македонија е далеку поповолна од оние каматни стапки по кои унгарските компании и граѓаните на земјата добиваат заеми, но и од стапката по која самата унгарска држава зема кредити, премиерот Христијан Мицкоски денеска рече оти се потврдиле тврдењата оти тој кредит бил исклучително поволен, или најповолен на пазарот за земјава, иако опозицијата тогаш обвинуваше оти кредитот е исклучително лош и оти со него идните генерации во земјава ќе бидат заглавени во долгови.
Тој рече оти кредитот бил искористен за да се врати евробврзница од половина милијарда евра, додека пак 250 милиони биле инвестирани во општеството и 250 милиони во стопанството преку комерцијалните банки со повластена каматна стапка од 1,95%, што претставува добар поттик во економијата и резултира со пораст на бруто-домашниот производ на земјава.
„Од третиот квартал во 2024 до првиот квартал во 2026 година заклучокот е дека македонската економија расте со три отсто во реални параметри, а кај нашиот најголем партнер ЕУ порастот е 1,4 отсто и во еврозоната 1,25 отсто. Во услови кога нашиот најголем трговски партнер расте со стапка двојно помала од нашата, ние обезбедивме значаен раст, а во номинални услови нашата економија расте со над отсто отсто, според светска банка и ММФ за 2 години оваа влада номиналниот БДП го зголеми за 4,65 милијарди долари. Претходната влада го зголеми за 4,5 милијарда долари за 6 години“,
рече Мицкоски.
Дополнително, вели дека секогаш кога квазиекспертите кои се дел од опозицијата во македонскиот законодавен дом ќе коментираат на темата економија треба да ги земат предвид овие бројки, иако тие воопшто не им одат во корист бидејќи, како што вели, бројките се немилосрдни и егзактни.
„Еден плус еден е два, а тие сакаат да направат дека 1+1 е 6, опозицијата имаат експерти во парламентот кои сакаат да не убедат дека црното е бело и обратно“,
заклучи Мицкоски.
Минатата недела унгарскиот премиер Петер Маѓар рече оти новата унгарска влада ќе истражува дали има можна злоупотреба на државни средства во однос на кредитот од една милијарда евра што државната „Ексимбанка“ ѝ го даде на Македонија за време на претходната влада на Виктор Орбан зашто тој бил даден под многу поволни услови со каматна стапка од 3,25 проценти.
Заемот, како што рече тој, ќе го чини унгарскиот буџет 248 милиони евра поради каматните разлики, а целиот ризик од заемот го покрива унгарската држава.