Посочи дека граѓаните не треба да имаат дилема дека овие корумпирани политички елити од минатото ќе се обидат преку свои центри на влијание во секакви институции да создаваат етнички конфликти и тензии. Но, како што додаде, ситуацијата е контролирана
Постојано предупредувам дека не треба да се игра на етничка и верска карта бидејќи тоа е картата на која овие криминалци што изминатите години печалеа на грбот на народот ќе се обидат да предизвикаат нестабилност. Ова се такви изолирани инциденти, но ќе има уште вакви. Ова денеска на прес-конференција го рече премиерот Христијан Мицкоски коментирајќи го вчерашниот случај во гостиварското село Галате, кога жителите што иницираа акција за уредување на просторот околу црквата „Света Петка“ се пожалија дека полиција по налог на локалната самоуправа ги попречува во намерата.
„Ја слушнавте изјавата и на владиката кој се оградува од ваквите инциденти. И жителите од селото Галате се оградуваат. Она што е интересно е што на социјалните медиуми излегоа слики на некои луѓе во друштво на политички активни лица. Ако се земат предвид и политичката провиниенција и поддршката на градоначалникот на Општина Врапчиште, но и полициската структура која е во ОВР Гостивар тогаш многу лесно може да се дојде до заклучокот дека ова е дел од оној фолклор што се подготвува за сеење етничка, верска нетрпеливост и обид за дестабилизација“,
вели премиерот.
Очекува дека ваков тип инциденти ќе има во следниот период,
„Зошто? Затоа што не можеме како Влада, имајќи ги предвид последните измени во Законот за полиција и Законот за работа во Министерството за внатрешни работи, да се случат промените во раководните структури. Тие се лимитирани на пет години искуство на висока позиција, а вие знаете кој беа седум години во Владата. Ќе мора во следните два-три месеци да се случи измена на тој закон за да настане измена во раководните структури за да можеме реално да ја контролираме ситуацијата“,
рече тој.
Посочи дека граѓаните не треба да имаат дилема дека овие корумпирани политички елити од минатото ќе се обидат преку свои центри на влијание во секакви институции да создаваат етнички конфликти и тензии. Но, како што додаде, ситуацијата е контролирана.
„Брзо се реши и оваа ситуација. Не наидува на поддршка кај населението, самите жители на село Галате го отфрлија ова“,
вели Мицкоски.
Апелира во моменти кога во државата расте индустриското производство, преработувачката индустрија, кога се намали инфлацијата, кога се прават реформи и се носат добри мерки и странски инвестиции, да не дозволиме да нè влечат назад, како што рече, вакви корумпирани сеништа од минатото.
Инаку, жители на селото Галате вчера се пожалија дека полицијата ги попречува да ја спроведат акцијата за уредување на просторот околу црквата „Света Петка“, која уште во 2001 година е оштетена од пожар.
Од Министерството за внатрешни работи посочија да не се подгреваат меѓуетнички и меѓурелигиски тензии на јавен простор или преку социјалните медиуми бидејќи ќе биде предмет на кривично-правен прогон од страна на полицијата.
Премиерот Мицкоски во август изјави дека според информации добиени од повеќе канали, раководството на Демократската унија за интеграција (ДУИ) во обид, како што кажа, да го заштити капиталот што го создаваше изминатите 20 години, оваа есен ќе преземе чекори во насока на дестабилизирање на државата.
Потоа, премиерот даде уште една изјава на оваа тема, во која рече дека дека функционери во поранешни влади се обидуваат да предизвикаат меѓуетнички конфликт. Не посочи конкретни имиња, но рече оти тоа го прават елементи кои располагаат со огромни суми пари.