Претседателот на ВМРО-ДПМНЕ, Христијан Мицкоски, денеска ги отфрли шпекулациите дека референдумот кој ќе го иницира неговата партија ќе се однесува на вметнувањето на Бугарите во Уставот. Првиот човек на најголемата опозициска партија објасни дека тие се фокусираат на преговарачката рамка, поточно на делот во кој се вградени обврски од билатералниот договор меѓу Северна Македонија и Бугарија.
Мицкоски рече дека целиот процес од т.н. француски предлог опфаќа три елементи – договорот со Бугарија, уставни измени и усвојување на преговарачката рамка во која е вграден договорот со Бугарија, откако ќе се случат уставните измени.
„Ние немаме намера да се фокусираме преку референдумското изјаснување во тој дел (на Уставот н.з.) затоа што тоа се три различни процеси. Имаме билатерален договор, протоколот е дел од тој билатерелан договор каде што има историја, култура итн. Вториот процес, којшто е независен од првиот, е промената на Уставот и вметнувањето на Бугарите во преамбулата. Третиот процес, којшто зависи од вториот процес, а тоа е усвојување на преговарачката рамка во којашто, пак, е вметнат шверцерски првиот процес, а тоа е протоколот и билатералниот договор. Вториот процес, а тоа е промената на Уставот, веќе одговорив дека гарантирам дека нема да се случи. А, гаранција за тоа е зборот на 44 пратеници од коалицијата којашто ја предводи ВМРО-ДПМНЕ и останатите слободомислечки пратеници…. Ние се фокусираме на преговарачката рамка. Односно, да бидам уште попрецизен, членот 5, алинеја 4 од преговарачката рамка, каде што е вметнат протоколот и билатералниот договор. Тука треба да одлучат граѓаните дали прифаќаат. Дали прифаќаат ваква преговарачка рамка којашто ниту една од 27 земји членки и Албанија сега 28., немала, каде имаме билатерален договор“,
изјави Мицкоски
Според Мицкоски, нема потреба од брзање, бидејќи без уставните измени, процесот е практично закочен на почеток.
„Среќа што не ја дозавршија работата, односно немаме промена на Уставот, со тоа што ако имаше промена на Уставот тие ќе ја усвоеја преговарачката рамка и тогаш ќе беше мат за македонскиот идентитет. Сега засега работата е стабилна и така и ќе остане. Пратеничката група на ВМРО-ДПМНЕ и некои слободоумни пратеници во парламентот се браникот на македонскиот јазик и идентитет и нема да дозволат промена на Уставот“,
вели Моцкоски.
Тој вети и дека кога ќе дојдст на власт, ќе ги поништат сите штетни одлуки на актуелната владејачка гарнитура.
„Не треба да губиме надеж бидејќи не е работата завршена, односно браникот се пратениците на ВМРО-ДПМНЕ и коалицијата во парламентот… А потоа доаѓа нова Владата која треба сите овие грешки, една по една, да ги исправа и тоа ние пред јавноста си го зедовме како ветување и ветивме дека сето она што досега е погрешно направено, доколку нормално ја добиеме довербата на народот, а јас очекувам ВМРО-ДПМНЕ според последните анкети да има самата мнозинство во парламентот, овие грешки коишто се направени изминативе пет години да бидат исправени, а виновниците за сето тоа да одговораат“,
изјави Мицкоски.
Но, од новинарите Мицкоски доби прашања дали е сигурен дека нема да се најдат пратеници кои ќе гласаат „за“ потенцијални уставни измени. Притоа, новинарите го парафразираа министерот за надворешни работи, Бујар Османи, кој смета дека со сигурност ќе се одржи втората меѓувладина конференција (пред која мора да има измени на Уставот), дека уставните измени ќе се изгласаат и дека Мицкоски го велел истото пред Преспанскиот договор, па тој се случил.
„Па ајде, времето ќе покаже. Јас со сигурност Ви велам дека нема да се случи. А, јас, за Преспанскиот договор сум го кажал мојот став. Сум зборувал за тие осумтемина што го направија тоа предавство тогаш и немам што повеќе да додадам. Точно е, ја прифаќам таа грешка и тогаш и сега како грешка и моја и на ВМРО-ДПМНЕ, но еве, јас Ве уверувам дека тоа нема да се случи во овој случај“,
изјави Мицкоски.
Повеќе детали за референдумското прашање Мицкоски најави во следните неколку дена. До крајот на неделата, кажа, партијата ќе има состаноци и на Извршниот и на Централниот комитет.
Во контекст на уставните измени, Мицкоски беше прашан и за коментар на ставот на еврокомесарот за проширување Оливер Вархеи, кој патем доаѓа од партијата ФИДЕЗ на унгарскиот премиер и близок политичар на ВМРО-ДПМНЕ, Виктор Орбан. Вархеи кажа дека се надева дека сите партии, вклучувајќи ја и опозицијата, ќе докажат дека се за членство на земјата во ЕУ и дека се надева дека нема да започнат со контроверзии.
Одговорот на Мицкоски беше дека не сака да ги споделува вредностите кои довеле до промената на знамето, името, Уставот…
„Јас го почитувам неговиот став. Но, се надевам дека и тој го почитува мојот став, а тоа е дека Македонија и македонскиот народ премногу дадоа за тие европски вредности. Насила ни беше сменето знамето. Насила ни беше наметната времената референца за името. Добивме случај во Хаг и тој насила ни беше понитшен под изговорот – тоа е меѓународно право, појаките имаат поголемо право. Потоа, насила ни беше променет Уставот, насила ни беше променето уставното име. Насила сега беше прошверцуван обид да се начне македонскиот идентитет. Ако сето ова се европски вредности, простете, јас не сакам да ги споделувам“,
кажа Мицкоски.
Во дел од своите одговори Мицкоски кажа и дека тоа што се случило вчера во Брисел, не е ниту почеток на преговори ниту почеток на скрининг процесот.
„Нити скрининг има нити преговори има. Ова што тие го нарекуваат скрининг е мониторниг што трае од првиот момент кога ние сме земја кандидат, од 2005 година. 17 години. Сме биле во Влада, знаеме што значи тоа. Можеби, според нив, тоа се нарекува скрининг, но нема никаква врска и тоа е јасно покажано во документите што вчера ги потпишуваа… Ова вчера беше обична фото-сесија, а богами гледам и се заблажија. Гледам торти имаше таму… Албанија ќе си преговара, а ние повторно ќе си седиме во чекалната“,
кажа Мицкоски.
Во истиот настап, додека Мицкоски образложуваше дека неговата партија ќе спречи измена на Уставот, а со тоа и усвојување на преговарачката рамка која е неприфалтива за ВМРО-ДПМНЕ, тој кажа и дека има информации дека е можно Софија да направи „маневар“. Не би бил изненаден, изјави Мицкоски, ако Софија се откаже од барањето за уставни измени со што брзо би се усвоила и преговарачката рамка.