Убеден сум дека ВМРО-ДПМНЕ и коалицијата „За обнова на Македонија“ ќе бидат сериозни побединици на овие избори и се надевам дека претседателот Пендаровски ќе го даде мандатот на победничката коалиција, вели во интервју за МИА, опозицискиот лидер Христијан Мицкоски.
Во интервјуто, Мицкоски зборува за партиската изборна програма и за очекувањата околу идните коалиции.
Порача дека главен фокус на партијата ќе биде економијата, а ВМРО-ДПМНЕ вели дека ќе коалицира со секој политички субјект со којшто ќе успее да постигнеме договор на ниво на програма.
„Најпрвин ќе има многу проекти што во првите сто дена ќе ги реализираме, но прв проект ќе биде оние три денари акциза што ги донесе СДСМ, веднаш ќе ги конвертираме во спортски денар, еден денар за спортот, еден денар за културата и еден денар за образованието. Втора работа што ќе направиме веднаш, веднаш безусловно ќе го укинеме прогресивниот данок, а не како што тоа го направи СДСМ со одлагање и ќе го воведеме рамниот данок и веднаш ќе следи негово намалување од десет на девет проценти во 2021 година и понатаму осум проценти во 2022 година. Ќе укинеме многу работи коишто до сега ги правеше СДСМ како што се непродуктивните трошења, оние буџетски средства коишто во моментот се трошат за партиски вработувања што се тотално непродуктивни и еве тука можеби би го вклучиле ребалансот на буџетот, низа сет на мерки што ќе го тангираат здравството, образованието…“,
вели Мицкоски.
На прашањето како ги коментира критиките во јавноста за дел од партиските спотови и дали верува дека со нив партијата наместо да добие, би изгубила гласови, Мицкоски вели:
„Тоа ќе видиме на 15 јули, дали ќе се соочиме со губење гласови или пак нема да соочиме туку ќе добиеме гласови. Инаку, да јас ги разбирам и СДСМ и Зоран Заев, тешко е и мачно е да се гледа тоа што го направија изминативе три години, но затоа сме тука да понудиме практично алтернатива на кое што го стори СДСМ изминативе три години со сите оние понижувања, лаги, невистини, конструкции, криминал, корупции, Луи Витон ташни, трас, трас судски одлуки. Гледаме таму како еден поранешен функционер од Владата предводена од СДСМ како купчиња си реди слободно во чанта. Тоа е она што е тешко да се гледа и на тоа се губат гласови, а инаку ова е реалноста што ни ја најави Зоран Заев дека треба да си ја свиткаме кичмата. Но, среќа е, не треба граѓаните да губат надеж. Има алтернатива и свитканата кичма ќе остане само запаметена по времето на Зоран Заев. Во иднина ќе имаме гордо крената глава“,
вели Мицкоски.