Раѓањето на синот Божји ја симболизира надежта за подобро утре, мирот и спасението на човековиот род кои тој со себе ги донесе на овој свет, порача претседателот на ВМРО-ДПМНЕ, Христијан Мицкоски, во честитка до православните христијани по повод Божик.
„Токму празничните божиќни мигови нека ги исполнат домовите на верниците со божјата светост и радост за веста за раѓањето на Спасителот. Срцата нека се исполнат со топлината и нека се пренесе гласот дека Богомладенецот Христос е роден. Благословот Господов нека е над сите нас, да се насочиме кон добрите дела и хуманоста бидејќи тие се смислата на човекољубието и нашата Христова вера, љубовта кон ближните и надежта за спасението. Во празнични денови да си споменеме и за сите оние кои страдаат поради растечката немаштија и да им пружиме рака, да направиме богоугоден гест и да им помогнеме. Луѓето кои живеат до нас, нашите соседи, без оглед на разликите се наши браќа и треба да си бидеме потпора во овие тешки времиња“,
порача Мицкоски.
Тој во честитиката повикува на сплотеност и обединување во борбата со корупцијата и криминалот во земјата.
„Така ќе се сплотиме рамо до рамо против предизвиците на новото време кои го ништат нашето општество и кои ја загрозуваат нашата татковина Македонија. Криминалот и корупцијата се злото на ова доба, и тоа бара обединување и заедничка борба. Злото се поразува со добро, а народот во Македонија секогаш знаел да ја одбере страната на доброто и да биде на страната на победниците. Така било во минатото и така ќе биде додека векот векува. Нека е честит и вековит празникот Божик. Нека е вечна Македонија. Христос се роди! Навистина се роди!“,
додава Мицкоски.