Лидерот на ВМРО-ДПМНЕ Христијан Мицкоски вели дека со денешниот предлог на Совветот за безбедност да се прогласи кризна состојба поради состојбата со ковид, го прифатиле она што тој го предлагал пред 8 месеци, кога беше воведена вонредна состојба.
„Пред 8 месеци предложив воведување на кризна состојба, пред сè затоа што таа е регулирана согласно закон, без можност за широки толкувања, што би се рекло со помали шанси за злоупотреба. Тогаш одговорот на Заев беше дека кризна состојба нема да ги постигне посакуваните ефекти, а Стево Пендаровски велеше дека за ангажирање на војската и ресурсите не е потребна кризна состојба и дека државата нема ресурси за прогласување на кризна состојба на целата држава“,
напиша вечерва на својот Фејсбук профил Мицкоски.
Но, тој од денешен аспект смета дека заразата со корона е многу распространета, а системот е целосно блокиран, поради што смета дека кризната состојба нема да биде искористена за вистинска борба против ковидот, туку за, како што вели, „замајување на јавноста дека работат нешто, додека пандемијата ќе продолжи да одзема животи поради неспособност“.
„Како тоа има потреба за кризна состојба, а Заев тера избори во криза во Штип и Пласница. Ќе почекаме да дојдат на ставот дека нема услови за корона избори“,
напиша Мицкоски на Фејсбук.