Постапката за разрешување на Коцевски, која во февруари годинава беше иницирана токму од Владата, според премиерот, треба да остане во фазата во која се наоѓа во моментов, поради трагедијата во Кочани на чија истрага работи тим од 11 обвинители
Премиерот Христијан Мицкоски најави дека постапката за разрешување на државниот јавен обвинител Љупчо Коцевски ќе биде запрена. Постапката за разрешување на Коцевски, која во февруари годинава беше иницирана токму од Владата, според премиерот, треба да остане во фазата во која се наоѓа во моментов, поради трагедијата во Кочани на чија истрага работи тим од 11 обвинители.
Во оваа смисла, Мицкоски рече дека на обвинителите кои работат на случајот од Кочани треба да им се даде шанса да работат и да сработат. Вели дека заедничката работа на Јавното обвинителство и Министерството за внатрешни работи (МВР) во рамки на истрагата за трагедијата во Кочани резултира со 34 обезбедени лица.
„Но, исто така, јавноста е чувствителна и на некои случаи од минатото. Треба да видиме, да почекаме, дали Јавното обвинителство има амбиција и тука да констатира некои неправилности од минатото и дали би можело повторно тие случаи можеби да ги преразгледа, па да видиме дали навистина сме сите за правда или таа правда треба да биде селективна. Да видиме дали навистина таа правда некогаш е добиена или била селективна“,
изјави Мицкоски одговарајќи на новинарски прашања.
Додаде дека Владата го охрабрува Обвинителството да постапува во оваа насока, а секој оној кој работел спротивно на законот да биде санкциониран.
Инаку, постапката за разрешување на државниот јавен обвинител Љупчо Коцевски беше иницирана од Владата во февруари годинава, точно една година откако тој дојде на оваа позиција. Откако помина на владина седница, предлогот за разрешување на Коцевски пристигна до Советот на јавни обвинители на почетокот на март.
Коцевски го доби предлогот за негово разрешување на 6 март, десет дена пред да се случи трагедијата во Кочани. Во меѓувреме тој требаше да се произнесе по однос на предлогот за разрешувањето, а мислење во рок од 15 дена требаше да даде и Советот на јавни обвинители.