„Добивам поплаки дека дел од министрите и директорите се недостапни за народот, а има и такви на кои приватните патувања им станаа помили од посетата на селата и градовите. Заборавија од каде дојдовме и како започнавме“, рече Мицкоски во своето обраќање на прославата на 36-годишнината од основањето на ВМРО-ДПМНЕ
„Јас сега ќе работам на реконструкцијата на Владата, но од опозицијата треба да внимаваат што изјавуваат во однос на изборите, затоа што може и да им се оствари она што декларативно го зборуваат. Кога го гледам овој народ овде, пораката е јасна: ние сме подготвени. Подготвени сме за секое сценарио“, порача премиерот и лидер на ВМРО-ДПМНЕ
Вечерва сме собрани да покажеме дека идејата што започна пред 36 години не само што опстанала, туку денес е посилна од било кога, порача лидерот на ВМРО-ДПМНЕ, Христијан Мицкоски во своето обраќање на прославата на која се одбележаа 36 години од основањето на партијата.
Прославата се одржа на градскиот стадион во Струмица. На бината со богата сценографија беа изведени песни и музички изведби со претежно патриотски наратив, а присутните имаа можност да погледнат и сцени од историски личности, анимирани со помош на вештачка интелигенција, а беше прикажан и краток документарен филм за развојот на партијата од нејзините почетоци во независна Македонија.
Настанот се одржа под мотото „Македонија забрзува, наша обврска“, што лидерот на ВМРО-ДПМНЕ го истакна и во своето обраќање пред присутните, во кое говореше за предизвиците низ кои поминала партијата, како и за нејзината работа и проектите што ги спроведува како предводник на актуелната владина гарнитура.
„Вечерва сме собрани да покажеме дека Македонија повторно има енергија, повторно има надеж. Од Струмица вечерва испраќаме јасна порака – Македонија се исправа, чекор по чекор одиме напред и мора да забрза. Тоа е нашата обврска. Македонија која забрзува“,
рече Мицкоски.
Во говорот тој се осврна на проблемите што ги наследиле и кои, како што кажа, нема магично стапче да ги реши преку ноќ, но порача дека се прават чекори напред, кои можеби се мали, но се сигурни и иднина ќе стануваат сè поголеми.
„Во овие 36 години имаше многу тешки моменти. Имаше порази, имаше неправди, имаше разочарувања, имаше моменти кога многумина мислеа дека е полесно да се откажеш отколку да продолжиш понатаму. Но секогаш кога некој мислеше дека сме паднале, ние станувавме посилни. Секогаш кога некој мислеше дека сме поразени, народот ни даваше нова инспирација, нова енергија, нова сила. Секогаш кога некој сакаше да ја оттурне Македонија назад, се појавуваа луѓе кои беа подготвени да ја поведат напред. И јасно се отцртува границата и разликата. Тие од опозицијата мислат дека се родени за да бидат на власт, ние од ВМРО-ДПМНЕ сметаме дека сме предодредени да работиме и се жртвуваме за својот народ, граѓаните, кауза и татковина. Затоа и нашата сила доаѓа од народот. Тоа е така сега, но тоа така било и низ вековите. Нашата задача е борба во она што веруваме и сè додека сме силни обединети и правиме добро за државата тогаш татковината ќе има сила“,
рече Мицкоски.
Со порака до секој член на ВМРО-ДПМНЕ мора да биде свесен за историскиот габарит кој го носи ова име, Мицкоски се осврна на историјата и околностите во кои е создадена Внатрешната македонска револуционерна организација (ВМРО) на 23 октомври 1893, чија цел било создавање автономна Македонија. По речиси еден век на темелите на таа Организација, рече тој, е зародишот на денешната современа политичка партија ВМРО ДПМНЕ, основана на 17 јуни 1990 година.
„Континуитетот на кој се повикуваме и го поврзуваме со историската ВМРО не е никаков апстрактен поим или нешто имагинарно, туку суштински став, решение и идеологија длабоко вградена во програмските документи на ВМРО-ДПМНЕ, прифатена и верификувана од сите раководства на партијата во нејзината 36-годишна историја, а искрено примена од огромното членство и симпатизерите на партијата“,
рече тој.
Премиерот и лидер на ВМРО-ДПМНЕ, критикувајќи ги политичките противници рече и дека партијата била под жесток политички прогон во 2017, 2018 и на почетокот на 2019 година, како, како што кажа имало предлози од челници на СДСМ за укинување на акронимот ВМРО со закон.
„Замислете во 21. век. Но, еве, осум години подоцна, историјата е добра учителка, треба само да се постави прашањето каде се тие, каде е ВМРО-ДПМНЕ. ВМРО е име што се памети. Име што носи тежина. Име што буди чувство. Име натопено со солзите на генерации борци. Со денешен речник кажано, ВМРО е најголемиот политички македонски бренд. Создаден од историја. Од борба. Од болка, Од жртва. Од верба и од љубов кон татковината. ВМРО е идеја што трае“,
рече лидерот на партијата.
Во обраќањето тој се осврна и на претстојната реконструкција на Владата, порачувајќи дека сите отстапувања прецизно ги нотира, дека ќе има промени, како и дека нема да толерира занес во привилегиите што ги нуди власта.
Порача дека од утре ќе почне да работи на оваа тема, откако во партијата привршуваат со екипирањето и промените со над 30 проценти нови претседатели на комитети, а, како што наведе ќе следуваат и нови претседатели на Унијата на жени и на Унијата на млади сили на ВМРО-ДПМНЕ.
Говорејќи на оваа тема, тој рече дека многу прецизно го детектира и следи феноменот на скршнувања од она што треба да биде кодекс на однесување на Владата, посочувајќи дека има и такви на кои фотелјата и станала помила од контактот со народот.
„Добивам поплаки дека дел од министрите и директорите се недостапни за народот, а има и такви на кои приватните патувања им станаа помили од посетата на селата и градовите. Заборавија од каде дојдовме и како започнавме“,
рече Мицкоски.
Во тој контекст, рече дека тој пред осум години почнал токму од Струмица, кога станал претседател на ВМРО-ДПМНЕ. Тогаш, рече ги посетувал месните комитети со еден партиски автомобил, кој неретко се расипувал, со една наследена и истрошена камера и со двајца-тројца луѓе околу него. Но желбата за успех, додаде, била голема.
„И ова е порака дека нема да толерирам занес во привилегиите што ги нуди власта. Ние сме овде да му служиме на народот. Чистиот образ тешко се одржува, а лесно се губи. Кога јас можам да одговорам во текот на денот на стотици луѓе, сигурен сум дека тоа го може секој министер или директор. Да, не е лесно, но на народот му е потешко и не сакам изговори. Моите соработници ми велат: ‘Претседателе, многу сте меки во вашиот карактер’. Точно е. Јас на човек скоро и да не сум му повишил тон. Мојот праг на толеранција е огромен, кон секого се однесувам со почит и разбирање, што е и моја домашна култура, но тоа не значи, никако не значи, дека сум наивен и дека ќе толерирам несовесност и скршнување од принципите“,
рече Мицкоски.
Додаде дека не прифаќа оправдувања од ниту еден именуван функционер дека е уморен, а на уморните им порача дека е чесно само да си заминат.
„Сите отстапувања прецизно ги нотирам и ќе има промени. Тие промени треба да ги подобрат капацитетите и да го дадат максимумот од секој поединец. Сакам секој од вас да остане посветен на народот, достапен и чесен“,
рече тој.
Додаде дека тие како партија не се тркаат со опозицијата, бидејќи, како што наведе, таа не им е репер, како и дека го чувствува нивниот страв од избори.
„Што се однесува, пак, до нашите противници, го чувствувам нивниот страв од избори. Ова е единствената опозиција во светот која не сака избори. Кога ќе се спомнат избори, ги фаќа уплав. Држат прес-конференции, лажат, манипулираат. Се претворија во аналитика на Бирото за јавни набавки. Јас сега ќе работам на реконструкцијата на Владата, но од опозицијата треба да внимаваат што изјавуваат во однос на изборите, затоа што може и да им се оствари она што декларативно го зборуваат. Кога го гледам овој народ овде, пораката е јасна: ние сме подготвени. Подготвени сме за секое сценарио“,
порача Мицкоски.
Тој во говорот се осврна и на досегашната работа на Владата во овие две години.
„Покажавме дека со скромни ресурси можеме да направиме многу. Во овој кус период направивме Македонија да биде во топ пет во Европа по раст на БДП. Постигнавме историски рекорд од 1,255 милијарди евра странски директни инвестиции. Работиме на шест нови автопатски решенија. Проекциите се дека тие ќе бидат завршени до крајот на 2027 година“,
изјави Мицкоски.
Наведе дека во наредните десет години за капитални инфратруктурни проекти се предвидени инвестиции од 10 милиони евра, кои ќе бидат вложени во нови автопати, експресни патишта, пруги и обнова на постојните, здравствени и енергетски капацитети.