Двајцата се согласиле оти соработката е клучна за справување со глобалните предизвици и дека иднината на регионот е во одржлив развој, економски просперитет и сигурност
Во рамки на работната посета на Минхен, премиерот Христијан Мицкоски денеска имаше средба со претседавачот на Минхенската безбедносна конференција, Кристоф Хојзген. Разговарале за актуелните безбедносни предизвици во Европа и регионот и за можностите за зајакнување на меѓународната соработка во безбедноста и стабилноста.
„Премиерот Мицкоски ја истакна заложбата за унапредување на стратешкото партнерство со сојузниците од НАТО и потребата за напредок на патот кон ЕУ, како и за активната улога на земјата во регионалната безбедносна архитектура. Нагласи дека стабилноста на Западен Балкан е клучна за европската безбедност и ќе продолжи да работи на продлабочување на билатералните и мултилатералните односи во оваа област“,
информираат од Владата.
Според соопштението на владината прес-служба, двајцата се согласиле оти соработката е клучна за справување со глобалните предизвици и дека иднината на регионот е во одржлив развој, економски просперитет и сигурност.
Мицкоски денеска оствари средба и со својот хрватски колега Андреј Пленковиќ, со кого, како што информираа од Владата, ја нагласиле важноста на продолжувањето на политичкиот дијалог и економската соработка.