Дуда се надева дека „благодарение на напорите што во моментов ги прави претседателот Трамп, војната во Украина ќе заврши“
Полскиот претседател Анджеј Дуда денеска изјави дека добил „гаранции“ од САД дека не размислуваат за намалување на присуството на нивните сили во регионот. Изјавата на Дуда доаѓа по состанокот со американскиот специјален пратеник за Украина, Кит Келог.
Ројтерс пишува дека Дуда добил уверување од Келог дека Вашингтон нема намера да го намали бројот на војници во источна Европа.
„Нема загриженост дека САД ќе го намалат нивото на своето присуство во нашата земја, дека САД на кој било начин ќе се повлечат од својата одговорност или соодговорност за безбедноста на овој дел од Европа“,
изјави Дуда, пишува „Гардијан“.
Тој се надева дека „благодарение на напорите што во моментов ги прави претседателот Трамп, војната во Украина ќе заврши“.
Дуда, кој важи за поддржувач на Доналд Трамп, го повика населението „да остане смирено“ со оглед на промената на приоритетите на новиот американски претседател.
Полска, сојузник и сосед на Украина, беше последната станица на патувањето на Келог пред Киев, каде што треба да пристигне утре. Aмериканскиот специјален претседателски пратеник за Русија и Украина, Келог, е на патување низ Европа за да разговара со сојузниците и партнерите фокусирани на завршување на војната во Украина.
Неговата посета на Варшава дојде откако високи американски претставници се сретнаа со руските преговарачи во Саудиска Арабија по првпат откако Трамп ги изненади сојузниците на Вашингтон со тоа што се согласи да почне разговори со неговиот руски колега Владимир Путин.