Се надевам нема да бидам погрешно сфатен од останатите лидери на партии, бидејќи целта ми е да постигнеме консензус за важни прашања меѓу двете најголеми политички партии, рече Мицкоски
Бидејќи ме немаше подолг период во јавноста поради ковид-19, сега го повикувам Зоран Заев на тет-а-тет средба во Клубот на пратеници, тој нека избере ден и час, рече лидерот на опозициската ВМРО-ДПМНЕ, Христијан Мицкоски во гостување на Сител.
Мицкоски ја бараа оваа средба за да разговара со премиерот на сите теми кои, како што рече, ги засегаат граѓаните како пописот, здравствената криза, работата на Собранието, блокираните евроинтеграции и други важни теми.
„Ќе го прилагодам моето време како нему што му одговара за да разговараме за сите оние работи кои се од големо значење за граѓаните од кризата со пандемијата до работата на парламентот. Да разговараме сите отворени прашања кои не се решени,“
рече Мицкоски.
Тој додаде дека средбата ја бара само со Заев, а не и со останатите лидери на политичките партии.
„Да се состанеме ние двајца како лидери на двете најголеми политички партии во земјата кои имаат две третитини пратеници во парламентот. Се надевам нема да бидам погрешно сфатен од останатите лидери на партии, бидејќи целта ми е да постигнеме консензус меѓу двете најголеми политички партии. Јас не сум како Заев да го бирам раководството на политичкиот противник, но бидејќи тој во моментов е претседател на СДСМ, тие си го избрале“,
рече Мицкоски.