Мицкоски вели дека министерот Османи не бил свесен дека ова ќе остане во колективната меморија на македонскиот народ и оти не се знае која генерација на Албанци ќе има потреба од поддршка од Македонците
Претседателот на ВМРО-ДПМНЕ, Христијан Мицкоски вели дека Албанија е таа која ќе ги почне преговорите со Европската Унија, додека македонските политичари ќе одат само да се сликаат во Брисел на првата меѓувладина конференција. Тој во гостувањето во Дневникот на Сител рече дека оваа генерација на раководство на ДУИ прави трајна штета врз односите меѓу Македонците и Албанците во Северна Македонија.
„Ова ќе има голема меморија. Тие ги предадоа интересите на Македонците, нивните соседи, и направија пакт за асимилација на Македонците. Раководството на ДУИ прави трајна штета. Не е свесен Бујар Османи сега, но животот е осцилација. Не се знае која генерација на Албанци во Македонија ќе има потреба од поддршка од страна на нивните соседи Македонци. Ова ќе остане во колективната меморија на македонскиот народ. Најмалку 75 проценти од Македонците се против овој договор“,
рече Мицкоски додавајќи дека целта на министерот Османи била Албанија да ги почне преговорите.
Коментирајќи го билатералниот протокол кој денеска на брифинг со новинарите го презентираше шефот на дипломатијата, Мицкоски вели дека Бугарија не го затвора прашањето за македонскиот јазик.
„Пред да се случи таа вистинска меѓувладина (конференција) кога треба да се усвои преговарачката рамка има еден дел кадешто се вели ‘воведни изјави од страна на македонската Влада и ЕК‘, барем таму кадешто стои дека двете држави ќе дадат унилатерални изјави, не знам каква унилатерална изјава ќе даде Македонија за македонскиот јазик кој што е кодифициран, стандизиран уште на третата конференција на Обединетите Нации од 1977 година во Грција. А, каква изјава ќе даде Бугарија? Зошто тоа не го кажат? Еве и да има трета изјава па ЕК да каже ‘без разлика што да речеме Бугарија не го признава македонскиот јазик‘ или има поинаков третман на истиот. Сите останати 26 членки немаат дилема дека тоа е македонски јазик“,
истакна Мицкоски.
Рече дека Османи на брифингот со новинарите изјавил дека ќе има промена на учебниците по историја.
„Па се повикува на Самоиловото царство итн. се повикува и на други измени кои што треба да ги претрпат учебниците за историја, а до вчера нели Протоколот не беше дел од преговарачката рамка, нели историјата не беше дел од преговарачката рамка, јазикот е чист“,
рече Мицкоски.
Според претседателот на ВМРО-ДПМНЕ, со овој билатерален протокол Бугарија го задржала правото да постави вето кога и да посака.
„Одговорот е даден денеска на овој брифинг на Османи, но и она што што го зборувавме изминатиов период. Ние сега во овие преговори ќе зборуваме за се само не за владеење на право подобра економија, подобар здравствен систем подобро образование, подобар економски стандард, туку ќе зборуваме за јазикот, за самоиловата држава, за второто бугарско царство, за Гоце, за Даме, за Питу, дали се согласила Историската комисија или не се согласила, па ако не се согласил. Говор на омраза, па тој говор на омраза ќе предизвика ново вето и тоа е еден процес кој што цело време ќе се тркала“,
рече Мицкоски.