Мицкоски порача дека ВМРО-ДПМНЕ го има најголемиот кредибилитет да се бори за состав на новата влада
Лидерот на ВМРО-ДПМНЕ, Христијан Мицкоски, во своето прво обраќање до јавноста по гласањето, обвини за изборен поткуп и рече дека имаат информации дека сомнително се броени и внесувани податоците на интернет-страницата на ДИК.
„Овој резултат е постигнат во тешки околности, со силни притисоци и многубројни нерегуларности. Власта спроведе масовен поткуп. Сајтот на ДИК денес не работи, а добиваме различни информации дека сомнително се броени и внесувани податоците“,
рече Мицкоски.
Тој порача дека ВМРО-ДПМНЕ на овие избори го победила СДСМ и рече дека опозицијата влегува во трка за состав на нова влада.
„Опозицијата освои и повеќе гласови од власта. ВМРО-ДПМНЕ, без Беса во редовите на СДСМ, освои повеќе пратенички мандати. Победивме во 41 општина. Сето ова ни дава за право да кажеме дека ВМРО-ДПМНЕ го има најголемиот кредибилитет да се бори за состав на новата влада. Алтернативната на сето ова е Заев и продолжување на агонијата. Ова е тешка битка и ќе победиме заедно со граѓаните. Во деновите што следуваат ќе се отворат преговори со сите политички субјекти, па ќе видиме како ќе се одвиваат настаните“,
рече Мицкоски.
На прашањето дали е можна коалиција со ДУИ и дали би го прифатил условот за премиер Албанец, Мицкоски рече:
„Преговорите допрва ќе почнат. Сум кажал во минатото ќе кажам и сега дека јас под услови не работам“,
рече Мицкоски.
Околу изборните резултати, Мицкоски рече дека разговарал со претседателот на ДИК Оливер Деркоски од кој, како што рече, добил уверување дека секој записник се проверува и дека во текот на денот ќе излезат со конечен став.
Сепак, на прашањето дали од него ќе бараат одговорност, Мицкоски рече дека досега се задоволни од неговата работа.