Дали граѓаните сметаат дека Владата се справува успешно со кризата, вели лидерот на опозициската партија, може да се дознае на избори, а тоа ќе се случи ако премиерот веднаш реши тие да се одржат или, пак, за неколку месеци кога пратеници од СДСМ и ДУИ ќе гласаат за распуштање на парламентот
Ако Ковачевски навистина верува дека успешно се справува со кризата, наместо да дезертира, нека излезе на избори, па граѓаните да проценат дали е така, порача денеска претседателот на ВМРО-ДПМНЕ, Христијан Мицкоски, коментирајќи ја вчерашната изјава на премиерот Димитар Ковачевски дека опозицискиот лидер смета оти актуелната влада одлично се справува со кризата.
„Одлично. Ако тој верува дека е така, еве го повикувам да не дезертира, да излезе пред граѓаните на избори час поскоро и да види колку успешно се справува Владата. Граѓаните ќе кажат дали се справува успешно или не се справува успешно. Има еден начин тоа да се покаже, на избори, а вака ако продолжи да дезертира и да се крие, за жал ќе нè може да го добие сега и веднаш тој одговор на тоа дали успешно се справува и ќе треба да почекаме неколку месеци за да овие пратеници коишто доаѓаат од пратеничката група на СДСМ и ДУИ поддржат распуштање на парламентот и промена на владата“,
потенцираше Мицкоски.
Тој зборуваше и за уставните измени за вметнување на Бугарите и други народи во преамбулата од Уставот, велејќи дека ВМРО-ДПМНЕ останува на досегашниот став и не треба да се очекува дека тој ќе се промени бидејќи тие како опозиција не учествувале во креирањето на договорот ниту, пак, ветиле дека ќе се направат такви измени.
Ковачевски, пак, кога вчера во изјавата кажа дека Мицкоски смета оти Владата се справува одлично со енергетската и економската криза, зборуваше за барањето за предвремени избори. Рече дека комплимент за Владата е што се бараат избори во мај, а не во зима бидејќи тоа значи оти опозицијата смета дека успешно се менаџира со кризата.
„Сигнали од пратеници нема. Мицкоски не знам по кој пат поставува барање за предвремени избори. Јас имам многу јасен став бидејќи јас не ги менувам моите ставови како него на една недела, а тоа е дека избори ќе има во 2024 година во редовниот термин, зашто се наоѓаме среде економска и енергетска криза. Тоа што тој бара избори во мај, всушност, е и комплимент за владата, бидејќи не сака избори во зима – тој не сака да се справува со енергетска криза и економска криза. И комплимент е затоа што веројатно смета дека Владата одлично се справува и со економската и енергетската криза, бидејќи енергетската криза завршува на 30 април, а тој бара избори во мај што значи дека јас можам само да му се заблагодарам на довербата од мое и од име на министрите од економските ресори“,
рече вчера Ковачевски.