Во објавата на официјалната интернет-страница на ОБСЕ-ОДИХР пишува дека повикот за формирање Специјална изборна оценска мисија доаѓа по поканата за набљудување на предвремените парламентарни избори на 5 јули 2020 година
ОБСЕ-ОДИХР денеска објави повик за формирање Специјална изборна оценска мисија за изборите во Северна Македонија, при што бара од оние што ќе се пријават да бидат достапни веќе од 19 јуни.
Во објавата на официјалната интернет-страница на ОБСЕ-ОДИХР пишува дека повикот доаѓа по поканата за набљудување на предвремените парламентарни избори на 5 јули 2020 година.
Навремено распоредување набљудувачка мисија е еден од условите што ги наведува опозициската ВМРО-ДПМНЕ за учество на изборите.
Денешниот повик на ОБСЕ-ОДИХР значи и дека ќе нема продолжување на претходната мисија која беше отворена откако изборите беа распишани за 12 април, туку дека ќе се формира нова мисија. Во повикот се бараат кандидати за 7 позиции: шеф на мисијата, заменик-шеф, политички аналитичар, изборен аналитичар, аналитичар за регистрација на гласачите, правен аналитичар и аналитичар за медиуми.
Од повикот не е јасно дали мисијата ќе подразбира и распоредување краткорочни набљудувачи на самиот ден на гласањето.