Наместо да се координираат, тие се избегнуваа, а службениците во двете европски институции се убедувани да не комуницираат меѓу себе, наведува „Политико“
Урсула фон дер Лајен, претседателката на Европската комисија не е поканета на средбата помеѓу претседателот на Европскиот совет, Шарл Мишел и кинескиот претседател Си Ѓинпинг на маргините на форумот на Г20 што треба да се одржи следната недела во Индонезија, објави денеска „Политико“.
Според неименувани официјални претставници на ЕУ, на кои се повикува „Политико“, причината за тоа е што Фон дер Лајен не му дозволила на претседателот на Европскиот совет да присуствува на состанокот со индискиот премиер Нарендра Моди на форумот на самитот на Г7 во Германија, што се одржа во јуни.
Односите меѓу Лајен и Мишел, како што пишува магазинот, претрпеле значителен раскол во трите години од почетокот на нивните мандати.
Наместо да се координираат, тие се избегнуваа, а службениците во двете европски институции се убедувани да не комуницираат меѓу себе, наведува „Политико“.
Во оваа ситуација, не може да се очекува ЕУ да претстави обединет фронт на самитот на Г20 на Бали. На соработниците на лидерите на ЕК и на ЕС, вклучени во организацијата на патувањето за форумот, им е наложено да ја подготват својата програма на начин да не се сретнат тие двајцата, пишува „Политико“.
Овој раскол не само што влијае на законодавната и политичката агенда на ЕУ, туку и се заканува да ја поткопа позицијата на заедницата во светот, наведува магазинот.