Пратеникот од ВМРО-ДПМНЕ тврди дека на снимката е гласот на З.З. кој со непознат соговорник разговара за Боки 13
Пратеникот од ВМРО-ДПМНЕ, Антонио Милошоски, денеска на седницата на собраниската Комисијата за европски прашања, на која се разгледуваше предлог-законот за јавно обвинителство, презентира писмо, аудиоснимка и транскрипт за, како што наведе, разговор на лицето З.З. во врска со Боки 13.
Според него, оваа снимка покажува зошто некој не сака нелегално снимени разговори да бидат доказ во судски постапки.
„Сметам дека транскриптот и аудиоматеријалот фрлаат една мала светлина на тоа кој навистина сака скриена амнестија и зошто. И зошто некој предлага какви било материјали на кои има сериозни индиции за висока корупција и организиран криминал можат да важат до вчера, а не можат да важат денес или утре“,
рече Милошоски.
Тој пред пратениците ја пушти аудиоснимката, а потоа го прочита и транскриптот.
Според Милошоски, лицето З.З. на соговорникот му рекол: „Му требаат пари за тоа телевизијата и само прави некои комбинации. Го прашав Боки, од каде се парите за телевизија. Тој ми рече од Хрватска, но главно од Циле, Силјан Мицевски, од тоа проектот за старските домови, ако знаеш. Ние на неколку пати му помагаме така за телевизијата, главно за маркетинг за да му помогнеме. Тоа беше уште лани октомври, ноември 2018 година“.
На ова министерката за правда Рената Дескоска рече дека, без разлика на тоа какви материјали ќе се презентираат тука, заложбата за неселективна правда кај никој од пратениците, особено од владејачкото мнозинство, не е намалена ниту избледена и го повика ЈО, доколку има докази, па дури и индиции за сторени кривични дела, да отвори постапки и да ги процесуира.
„Вистинската адреса доколку има такви ситуации е ЈО. Се надевам дека и вие ќе постапите ако верувате во тоа што денеска го презентирате“,
рече Дескоска.
Премиерот Оливер Спасовски, одговарајќи на новинарско прашање, рече дека нема да коментира ништо повеќе од тоа што е соопштено досега и дека овој случај мора да се истражи до крај, исто како и други случаи кои се криминални во државата.
„Секој еден што незаконски постапувал ќе мора да одговара. Најважно е да имаме одговорност. Тоа што го има во обвинителството треба самото обвинителство да го цени и врз основа на тоа да ги спроведе сите постапки“,
рече Спасовски.