Претседателот на Комисијата за надворешна политика бара премиерот уште денеска да ги достави документите за Бугарија до пратениците за собраниската дебата да може да се одржи уште утре
Пратеникот од редовите на ВМРО-ДПМНЕ и претседател на Комисијата за надворешна политика, Антонио Милошоски, преку писмо побара од премиерот Димитар Ковачевски и од министерот за надворешни работи Бујар Османи во текот на денешниот ден до пратениците во Собранието да бидат доставени два документи за Бугарија – протоколот и преговарачката рамка од француското претседателство, за кои тврди дека тие веќе ги поседуваат, објави Милошоски на Фејсбук.
Милошоски во писмото бара пратениците да го добијат протоколот што се однесува на Договорот за добрососедство со Бугарија, како и преговарачката рамка од француското ЕУ-претседателство, во која, како што наведува во писмото, билатералните спорови се утврдени како дел од условите за добивање датум за преговори со ЕУ.
Милошоски истакнува дека по добивањето на овие документи во Собранието уште утре би можела да се закаже седница на Комисијата за надворешна политика, со цел да се отвори собраниска дискусија во однос на Бугарија.
„По доставувањето на овие два битни документи, уште утре би одржале седница на Комисијата за надворешна политика бидејќи задутре, кога се одржува седницата на Советот на ЕУ, може да биде и предоцна. Седницата на Комисијата, поради големиот интерес, предлагам да биде отворена за јавноста, но согласно Деловникот за работа на Собранието на Република Македонија. Вие имате право да побарате таа да има и затворен карактер. Право е на Бугарија да си одлучи да дискутира за темата Македонија во нивното собрание, но за Владата и за Собранието во Македонија ваквата расправа во претставничкиот дом на граѓаните е уставна и морална обврски, бидејќи се работи за нашата држава“,
се вели во писмото на Милошоски.