Американскиот милијардер Мајк Блумберг денеска објави дека се повлекува од трката за номинација за претседателски кандидат на Демократската партија кој ќе му се спротивстави на Доналд Трамп.
Блумберг објави и дека својата поддршка му ја дава на поранешниот потпретседател Џо Бајден.
Блумберг вложи над 500 милиони долари од своето богатство во кампањата, а повлекувањето од трката следува по, за него разочарувачката завршница на „супервторникот“ (денот кога за кандидат гласаат демократите од 14 сојузни држави). Mилијардерот победи само на територијата на Американска Самоа, а вкупно свои само 27 делегати.
За победник на „супервторник“, според пребројани 80 отсто од гласовите, е прогласен Џо Бајден. Тој победил во девет од вкупно 14 држави во кои се гласаше вчера. Неговиот главен конкурент, независниот сенатор Берни Сандерс, извојувал сигурна победа во три сојузни држави, и најверојатно во Калифорнија, најголемата сојузна држава во САД, покажуваат 79 отсто од преброените гласови досега.
Според резултатите, Бајден победи во Тексас со 33,6 отсто добиени гласови (од 92 отсто досега обработени резултати), во Мејн со 33,9 отсто од 91 процент обработени гласови, во Масачусетс со 33,7 отсто од 92 проценти обработени гласови, во Минесота со 38,6 отсто од 100 проценти обработени материјали. Во Северна Каролина и Вирџинија, пак, тој победи убедливо со 43 и 53,3 отсто, од околу 90 проценти преброени гласови во двете држави. Тој ги однесе победите и во државите од американскиот централен запад како Оклахома, Арканзас, Тенеси и Алабама.
Берни Сандерс, пак, има сигурна победа во Јута (34,6 отсто, преброени 71 отсто), Колорадо (36,2 отсто, преброени 89 отсто) и во Вермонт (50,8 отсто, преброени 99 отсто). Во Калифорнија, Сандерс води со 33,5 отсто од 79 отсто преброени гласови.