Оставката, како што посочуваат од Владата, ќе биде разгледана, а потоа ќе биде информирано Собранието кое, пак, на седница треба да ја констатира. Доколку оставката на Милевски биде испратена до Собранието пред новата 86. седница, таа би можела да биде констатирана в четврток за кога е закажано ова парламентарно заседание
Министерот за локална самоуправа Горан Милевски денеска ја поднесе својата оставка до Владата, информираат оттаму за МИА. Оставката, како што посочуваат, ќе биде разгледана, а потоа ќе биде информирано Собранието кое што, пак, на седница треба да ја констатира.
Доколку оставката на Милевски биде испратена до Собранието пред новата 86. седница, таа би можела да биде констатирана в четврток за кога е закажано ова парламентарно заседание.
Согласно процедурата, ќе биде предложено друго име на министерското место за локална самоуправа. Иако во јавноста веќе циркулираат одредени имиња, официјално се уште не се знае кој ќе го наследи Милевски.
Милевски вчера изјави дека повлекувањето од министесрската позиција е поради лични причини, а дека до крајот на неделата се очекува неговата партија, Либерално-демократската партија (ЛДП) да предложи нов кандидат за министер. Новиот министер, според Милевски, нема да биде од редовите на пратениците.
Горан Милевски e член на Либерално-демократската партија од 1995 година, а од 2015 година ја извршува функцијата претседател на ЛДП. За министер за локална самоуправа, пак, е избран на 27 јуни 2019 година.
Милевски ќе остане претседател на ЛДП се до редовниот конгрес на партијата што треба да се одржи во декември кога ќе треба да се избере ново раководство.