Претседателот, Александар Вучиќ, одговарајќи на новинарско прашање рече дека многу добро знае каков е условот за пристапување на Србија во ЕУ, а тоа е и решавање на прашањето за Косово, односно односите меѓу Белград и Приштина
Канцеларката Меркел утре ќе отпатува за Тирана каде што освен со албанскиот премиер, ќе се сретне и со премиерите на Северна Македонија, Босна и Херцеговина и Косово
Германската канцеларка Ангела Меркел денеска во Белград изјави дека косовското прашање мора да се затвори пред Србија да влезе во ЕУ, но дека сите други отворени прашања во процесот на европска интеграција треба да се решат пред тоа.
На прашањето дали признавањето на Косово е услов за членство на Србија во ЕУ, Меркел на заедничката прес-конференција со српскиот претседател Александар Вучиќ рече дека „некои прашања ќе бидат решени на крајот на процесот“ на европската интеграција на Србија.
„Ова прашање (Косово) мора да се реши со цел земјите-членки на Унијата да одговорат потврдно за пристапувањето на Србија во ЕУ. Но, нема смисла да се разговара за крајот на тој процес пред да се решат другите проблеми. Јас сум за прагматичен пристап. Тој мора да се реши, но јас сум за патоказот, каде што сите други прашања се решаваат прво“,
рече Меркел.
Претседателот, Александар Вучиќ, одговарајќи на новинарско прашање рече дека многу добро знае каков е условот за пристапување на Србија во ЕУ, а тоа е и решавање на прашањето за Косово, односно односите меѓу Белград и Приштина, пренесе Н1.
„Затоа го водиме овој дијалог на сериозен и одговорен начин. Како што вели Приштина дека има свој устав, Србија исто така има свој устав, но ние сме подготвени да разговараме за сите можни компромисни решенија“,
рече српскиот претседател.
Тој рече дека компромисот ќе биде поблизок доколку Белград и Приштина прво ги регулираат меѓусебните односи така што ќе имаат слободен проток на луѓе, стоки и капитал.
„Јас сум против замрзнатиот конфликт и не мислам дека замрзнатиот конфликт е решение и знам дека никој во Србија нема да биде среќен со овие зборови, но мислам дека е добро што оваа генерација го решава ова прашање, но мора да е компромис, а не решение што ќе биде понижувачко за Србија“,
рече Вучиќ.
Канцеларката Меркел утре ќе отпатува за Тирана каде што освен со албанскиот премиер, ќе се сретне и со премиерите на Северна Македонија, Босна и Херцеговина и Косово.
Средбата со премиерите од регионот во Тирана ќе биде посветена на Берлинскиот процес, политичко-дипломатска иницијатива, која почна во август 2014 година од страна на Меркел.
Учесниците во процесот се земјите од Западен Балкан – Северна Македонија, Албанија, Босна и Херцеговина, Косово, Србија и Црна Гора, а нејзини поддржувачи се неколку земји членки на ЕУ, како Германија, Франција, Австрија, Италија, Велика Британија, Полска, Грција, Хрватска, Словенија и Бугарија.
Најважната компонента на Берлинскиот процес е таканаречената „Агенда за поврзување“, која првично има за цел да ги поврзе шесте земји од Западен Балкан во областа на транспортот и енергетиката.