Германската канцеларка одговараше на прашање на претседателот на Комисијата за европски прашања на Бундестагот, Гинтер Крихбау, кој зборуваше за злоупотреба од страна на земјите членките кон земјите кандидати за да ги промовираат своите билатерални прашања
Германската канцеларка Ангела Меркел очекува деновиве да се реши прашањето за пристапните преговори на Северна Македонија со ЕУ. Таа во одговор на прашање на претседателот на Комисијата за европски прашања на Бундестагот, Гинтер Крихбау, кој зборуваше за злоупотреба од страна на земјите членките кон земјите кандидати за да ги промовираат своите билатерални прашања, одговори дека е во контакт со бугарскиот премиер Бојко Борисов и се надева дека ова прашање наскоро ќе биде решено.
Амбасадорите на земјите членки на ЕУ вчера попладне ги усвоија заклучоците за проширување со Западен Балкан, откако во нацрт-текстот беше вметната реченицата „погрешно толкување на историјата“, на што инсистираше Бугарија како компромис за да го одблокира нивното донесување.
Германското претседателство предложи нов текст кој го вклучува барањето на Бугарија.
Германската амбасадорка во земјава Анке Холштајн вчера за Дојче веле изјави дека заклучоците се однесуваат на шесте земји во регионот и затоа е важно што тие беа усвоени, за да се покаже дека проширувањето продолжува.
За членот 8, во кој се споменуваат Преспанскиот договор и Договорот за добрососедство со Бугарија, амбасадорката објаснува дека станува збор за истата реченица што беше наведена во заклучоците на Советот за проширувањето во 2018 година.
Македонската Влада синоќа, коментирајќи ги заклучоците на Комитетот на постојани претставници (КОРЕПЕР), изрази разочарување што ЕУ не најде начин да донесе позитивна одлука за усвојување на преговарачката рамка, што ќе овозможеше првата меѓувладина конференција меѓу ЕУ и Северна Македонија да се одржи до крајот на 2020 година, за време на германското претседателство.
Ова не е првпат по блокадата од Бугарија германската канцеларка да изрази оптимизам дека е можно да се најде решение за несогласувањата и до крајот на годината да се одржи првата меѓувладина конференција со С Македонија.
„Се соочуваме со тешкотии да овозможиме одржување на меѓувладината конференција со Северна Македонија, но сѐ уште има шанси да се одржи оваа година, во текот на германското претседавање со ЕУ“,
изјави Меркел на крајот на минатиот месец, на видеоконференцијата со европарламентарците.
„Албанија направи голем напредок, но особено во прашање е дали ќе успееме навреме со Северна Македонија, затоа што, како што знаете, сѐ уште постои потреба од преговори меѓу Бугарија и Северна Македонија“,
рече Меркел.