Се обезбедува брз и точен пренос на податоци, непречена испорака на електрична енергија и се минимизира ризикот од прекин на пренос на податоци во случај на хаварии и лоши временски услови, вели директорот на МЕПСО
Брз, стабилен и точен пренос на податоци, непречена испорака на електрична енергија и минимизирање на ризикот од каков било прекин при преносот во случај на хаварии или лоши временски услови, ќе овозможи најновата телекомуникациска опрема на АД МЕПСО што од денеска ќе биде ставена во функција.
Со ова современо решение, како што беше речено на настанот по овој повод, МЕПСО го почнува процесот на дигитализација на преносната мрежа.
Се работи за проект вреден 4,9 милиони евра, од кои 2,9 милиони се средства од ЕБОР, а останатите од АД МЕПСО.
„Опремата е темел за добивање навремени податоци и со ова решение МЕПСО го почнува процесот на дигитализација на преносната мрежа. Со оваа најмодерна технологија ќе се постигне домаќинско и ефикасно искористување на оптичките влакна интегрирани во далекуводите и ќе се обезбеди шифрирање и комплетна заштита на информацијата која ќе се транспортира. На тој начин, се обезбедува брз и точен пренос на податоци, непречена испорака на електрична енергија и се минимизира ризикот од прекин на пренос на податоци во случај на хаварии и лоши временски услови“,
истакна генералниот директор на МЕПСО, Орхан Муртезани.
Тој напомена дека техничките перформанси на досегашната опрема која датира од 2004 година, веќе не нудат опции кои би одговориле на дејноста. Во моментов, нагласи Муртезани, за поврзување на податоците се користи опрема која веќе нема поддршка од производителот, ниту за неа се произведуваат резервни делови.
Инсталирањето на новата опрема го поздрави и премиерот Димитар Ковачевски, кој потенцира дека во услови на енергетска криза како актуелната, од исклучително значење е стабилниот пренос на податоци.
„Денес имавме можност да го видиме најсовременото решение за телекомуникациска опрема и далечински мониторинг на трансформаторските станици во МЕПСО. Ова значи дека ќе имаме сигурен пренос на електрична енергија, што во услови на криза е исклучитлено важно. Целта е да се обезбедува брз и точен пренос на податоци, непречена испорака на електрична енергија и ризикот од прекин да се сведе на минимум“,
истакна Ковачевски.
Тој додаде дека Владата е насочена кон инвестиции во енергетскиот сектор кои ќе ја зголемат енергетската транзиција и независност.
„Во услови на голема светска криза преземаме мерки за ублажување на енормниот раст на цената на електричната енергија на светските берзи, како и на цената на храната. Паралелно преземеме мерки кои на среден и долг рок ќе ја зголемат енергетската независност. Го зголемивме домашното производство на електрична енергија и ги задоволуваме 100 отсто потребите на сите домаќинства и на малите потрошувачи“,
рече Ковачевски.
Ковачевски додаде дека се инвестира во енергетиката за да има резултати и на среден и на долг рок.
„Донесовме нова стратегија за развој на енергетиката до 2040 година целосно базирана на европскиот зелен договор“,
додаде тој.
На пуштањето во употреба на опремата се обрати и претставникот од ЕБОР, Анди Аранитаси, а присуствуваа и вицепремиерот за економски прашања Фатмир Битиќи, претставници од фирмите изведувачи, како и раководството на ЕСМ и МЕПСО.