Во вчерашното писмо до раководството на партијата, Мелони наведува дека е лута и тажна затоа што со овој потег е нарушен угледот на партијата
Секој што го велича фашистичкото минато на Италија треба да биде избркан од Браќа на Италија, изјави лидерката на партијата и премиерка на Италија, Џорџа Мелони.
Таа ова го изјави откако медиумите минатата недела објавија видео на кое се гледа како неколку члена на младинската група на партијата ја креваат десната рака во фашистички поздрав извикувајќи „Зиг хајл“ (Sieg Heil).
Во вчерашното писмо до раководството на партијата, Мелони наведува дека е лута и тажна затоа што со овој потег е нарушен угледот на партијата.
„Во нашата партија нема место за расизам или антисемитизам, како што никогаш немало место за оние што носталгично гледаат на тоталитарните режими од минатиот век. Нашата задача е премногу важна за да дозволиме да биде уништена од оние што не ја разбираат нејзината големината“,
изјави Мелони.
Партијата Браќа на Италија потекнува од неофашистичката група која се појави по Втората светска војна, но Мелони се обидува да се дистанцира од ултрадесничарите и вели дека нејзината партија е класично конзервативна.
По објавувањето на видеото на порталот „Фанпејџ“, италијанската опозиција соопшти дека владејачката партија е рај за екстремните десничари и оти се лажни напорите на премиерката да се претстави како умерена политичарка и во Италија и во светот.
Премиерката, која минатата недела ги осуди методите на „Фанпејџ“, рече дека нејзината партија мора да биде транспарентна и доследна.
„Секој што верува дека јавната слика на членовите на нашата партија не соодветствува со тоа какви се приватно, едноставно не разбира какви сме ние и затоа не е добредојден“,
рече таа.