Цените на лебот, брашното и печивата ќе се зголемат за најмалку 10 отсто до крајот на ноември, објави државата МИА, повикувајќи се на Групацијата на мелничко-пекарската индустрија при Стопанската комора.
Како причина за ова поскапување мелничарите ги наведуваат скапата струја и растот на берзанските цени на пченицата. Тие бараат субвенции за сметките за електрична енергија и да бидат додадени на регулираниот пазар. На тој начин, велат, би се смирила ситуацијата и соодветно би се намалиле цените.
Претседателот на Групацијата на мелничко-пекарската индустрија во Стопанската комора, Горан Малишиќ, во изјава за МИА вели дека голема корист би имале од ноќните вишоци што ги продава ЕСМ.
„Во сегашната консталација, берзанската цена на пченицата како основна суровина повторно почна да расне. Од жетвата 2022 г. цената на француската берза е зголемена за околу 10 отсто, а и зголемувањето во Србија е, исто така, 10 проценти. Тоа значително ќе ја зголеми цената на брашното и на лебот со печивата за минимум 10 проценти во наредниот период од максимум 40 до 50 дена“,
вели Малишиќ.
Мелничарите се жалат дека цената за киловатчас за компаниите е зголема за 500 отсто за разлика од лани.
Малишиќ вели и дека залихите за пченица кај приватните субјекти, силоси и мелници се на историски минимум. Појаснува дека домашната жетва годинава е намалена, но и дека мелниците не можеат да набават пченица од увоз поради високите цени.
Мелничарите очекуваат идната недела да има средба на повисоко ниво меѓу Комората и ресорните министерства за да се изнајде решение за кризата.