Ерик Мејер, заменик-шеф на мисијата во Амбасадата на САД, во обраќањето на Петтата пленарна седница на Националната конвенција за европска интеграција, нагласи дека во партнерство со владата на Словачка, американската влада даде поддршка на Националната конвенција за ЕУ на Северна Македонија и заедно ги поставија темелите за успешен процес на преговори
САД како ваш стратешки партнер и сојузник, стојат цврсто зад вашиот пат кон ЕУ затоа што тоа промовира мир, демократија, просперитет на европскиот континент и дава иднина на граѓаните што тие ја заслужуваат. Во изминатите години преку американските агенции за меѓународен развој, американската влада го унапреди доброто владеење, децентрализација, исто така ги направи принципите на транспарентно владеење и помогна да се креираат политики коишто се усогласени со ЕУ.
Ова го истакна Ерик Мејер, заменик-шеф на мисијата во Амбасадата на САД, во обраќањето на петтата пленарна седница на Националната конвенција за европска интеграција. Тој нагласи дека во партнерство со владата на Словачка, американската влада даде поддршка на Националната конвенција за ЕУ на Северна Македонија и заедно ги поставија темелите за успешен процес на преговори.
„Во изминатите пет години Националната конвенција даде значаен придонес да ја подготви земјата да се приклучи кон ЕУ. Работните групи овозможија отворена инклузивна дебата за интеграцијата во ЕУ заедно со претставниците од граѓанскиот сектор, претставници од Владата, граѓански организации, како и поединци експерти. Особено сум задоволен што имаме различни претставници кои опонираат на политичките мислења на сите прашања поврзани со реформите“,
рече Мејер.
Тој истакна дека е охрабрувачки што сите препораки од работните групи се веќе применети, но потребно е вели, да се покаже понатамошна заложба од страна на сите чинители за континуирано усвојување и примена на преостанатите препораки на Националната конвенција. При тоа ги повика граѓанските организации коишто се вредни партнери да продолжат активно да бидат вклучени во процесот на преговори.
Словачкиот амбасадор Хенрик Маркуш меѓу другото го подвлече значењето на Националната конвенција за подготовката на земјата за пристапните преговори за членство во ЕУ нудејќи дебати со вклученост на националните актери – Владата, парламентот, граѓанското општество, деловната и академската заедница, но и на странски експерти, особено од Словачка, споделувајќи го словачкото искуство на патот кон ЕУ.