Медведев е еден од најголемите поттикнувачи на руската војна во Украина и редовно објавува остри обвинувања против Западот на социјалните мрежи
Поранешниот руски претседател Дмитриј Медведев го предупреди НАТО да не испраќа противракетни одбранбени системи „Патриот“ во Украина бидејќи ќе стане легитимна цел и ја нарече Алијансата „криминален ентитет“ бидејќи ги снабдува „екстремистичките режими“ со оружје.
Медведев, кој се претставуваше како либерален модернизатор кога беше претседател на Русија од 2008 до 2012 година, стана еден од најголемите поттикнувачи на руската војна во Украина и редовно објавува остри обвинувања против Западот на социјалните мрежи.
„Ако НАТО, како што посочи генералниот секретар на НАТО, Јенс Столтенберг, ги снабдува украинските фанатици со системи „Патриот“ и персонал на НАТО, тие веднаш ќе станат легитимна цел на нашите вооружени сили“,
напиша Медведев на Телеграм.
Ројтерс пишува дека не е јасно дали цел ќе бидат системите Патриот, украинските сили или персоналот на НАТО.
„На цивилизираниот свет не му е потребна оваа организација. Таа мора да се покае за човештвото и да биде распуштена како криминален ентитет“,
напиша Медведев.
Украина побара од западните партнери оружје за противвоздушна одбрана, вклучително и системи „Патриот“ од американско производство, за да се заштити од руските напади врз нејзината енергетска инфраструктура.