Само двајца ученици пријавиле дека се во изолација поради ковид-19 и дека не можат да полагаат, а еден матурант се јавил за дополнителниот рок, кој ДИЦ го овозможи на крајот на јуни
Средната оценка од двата екстерни испита на државната матура која се одржа во јуни е 3,61, која е малку подобра од претходната државна матура во 2019 година, кога просечниот успех беше 3,48.
Резултатите од тестовите на речиси 15 300 матуранти кои полагаа минатиот месец денеска на прес-конференција ги соопшти директорката на Државниот испитен центар (ДИЦ) Елизабета Наумовска, а истите се објавуваат на огласните табли во училиштата и во системот matura.gov.mk.
Наумовска рече дека преведено во оценка, резултатот од оваа матура е многу добар (4), за разлика од 2019 кога оценката беше добар (3).
Тоа покажува, рече таа, дека матурантите, и покрај отежнатите услови, успеале да постигнат повисоки резултати и покажале дека тоа е возможно и со онлајн-наставта. Притоа, посочи дека на оваа генерација матуранти им е излезено во пресрет и полагаа по скратени испитни програми.
Од испитот по македонски јазик и литература просечната оценка е 3,93, а полагале 10 647 матуранти. Во 2019 оценката била 3,69.
Албански јазик и литература средна оценка е 3,59, полагале 3 873, а во 2019 година средната оценка била 3,85. Турски јазик и литература постигната е средна оценка 3,57 од 253 матуранти, а во 2019 средна оценка била 3.73. Средниот успех по англиски јазик е 2,82 од 13 033 матуранти што полагале. Претходната матура средна оценка била 3,07. Француски јазик полагале 31 ученик и постигнале просечна оценка 4,58, а пред две години успехот бил 4,61. Германски јазик полагале 135 со средна оценка 4.56, а во 2019 е постигната оценка 4,41. Руски јазик полагале 18 матуранти и е постигната просечна оценка 4,78 за разлика од 4,07 во 2019 година.
Математика полагале 1 510 матуранти и постигнале среден успех од 4,07, што е подобро од 2019-та кога е постигнат 3,66.
Во уметничките училишта вториот екстерен беше филозофија односно естетика. Филозофија полагале 13 матуранти и е постигната средна оценка 4,23 (во 2019 успехот бил 3.89) и естетика полагале 63 и постигнале просечна оценка 4,03 за разлика од 4,38 пред две години.
Само двајца ученици пријавиле се во изолација поради ковид-19 и дека не можат да полагаат, а еден матурант се јавил за дополнителниот рок, што ДИЦ го овозможи на крајот на јуни.
Матурантите имаат право на приговор во рок од три дена односно до среда, со уплата од 1 500 денари.
Новина е што на matura.gov.mk има достапни формулари и информации како да ги достават приговорите, односно тие се доставуваат до училиштето, кое скенирано ќе ги внесе во е-систем и ќе ги достави до ДИЦ.
Од среда комисии на ДИЦ ќе ги разгледуваат приговорите и на 12 јули ќе бидат соопштени конечните резултати од јунската испитна сесија. За тие што нема да достават приговори, овие ќе бидат конечни резултати.
Тие што ја положија матурата ќе може да се запишуваат на факултет, а за оние што не ја положиле или не во целост, следната сесија за полагање на екстерните испити е на 11 и 13 август.
Наумовска на прес-конференцијата соопшти и дека ДИЦ подготвува нова концепција за државна матура што би се применувала од идната учебна година
Државната матура во земјава се спроведува од 2007 година. Поради пандемијата минатата година не беше организирана, а оваа година по компромисот помеѓу Средношколскиот сојуз и Владата, на матурантите им беше овозможено да полагаат два наместо три екстерни испити и по скратени наставни програми. Покрај екстерни, тие имаа и два интерни предмета и проектна задача.