Приватното здравство го упатува последнот крик за спас. Ако ништо не се случи во текот на летото, матичните лекари од 1 септември нема да работат, вели Чолакова-Дервишова
Матичните лекари најавуваат дека од 1 септември ќе ги затворат ординациите доколку не бидат прифатени нивните барања за подобрување на условите за работа.
Претседателката на Здружението на приватни лекари, Лилија Чолакова-Дервишова во изјава за ТВ Сител, рече дека и по неколкуте протести на лекарите, нема никакво поместување во однос на нивните барања и принудени се на порадикални чекори.
„Приватното здравство го упатува последнот крик за спас. Ако ништо не се случи во текот на летото, матичните лекари од 1 септември нема да работат“,
изјави Чокалова-Дервишова.
Таа вели дека не сакаат на овој начин да вршат притисок, но дека немаат друг избор, бидејќи како што вели, надлежните немаат слух за нивните проблеми. Посочи дека работните групи формирани во Министерството за здравство не преговараат, а со ребалансот на буџетот нема дополнителни финансии за приватниот здравствен сектор.
„Ништо не е поместено. Цените секојдневно растат, и сметам дека нешто треба да се направи и приоритет да се даде на нашите барања“,
вели Чолакова-Дервишова.
Матичните лекари, меѓудругото, бараат поголема капитација, промена на режимот на лекови и казнената политика, електронско здравство, како и да се променат буџетите за специјалисти и лаборатории.
Здружението на приватни лекари и претходно излегуваше на протести, а од Министерството за здравство најавија дека ќе бидат формирани работни групи и дека проблемите наскоро ќе се решат.