Руте на средбата не коментираше за можни холандски испораки на оружје за Украина, иако претходно сигнализираше подготвеност да го направи тоа
Холандскиот премиер Марк Руте ѝ вети на Украина поддршка во сајбер-безбедноста. Тој го стори тоа за време на денешната посета на Киев, јави ДПА.
На прес-конференција со украинскиот претседател Володимир Зеленски, Руте изјави дека неговата земја може да понуди стручни совети во областа.
Во јануари Украина беше погодена од неколку хакерски напади врз владини интернет-страници, за што ја обвинија Русија.
Руте на средбата не коментираше за можни холандски испораки на оружје за Украина, иако претходно сигнализираше подготвеност да го направи тоа. Зеленски изјави дека Украина доставила листа со воени потреби на земјата од ЕУ, но додаде и дека целта на Украина е одржување на мирот.
Како што истакна Зеленски, посетите како оваа на Руте имаат за цел да помогнат да се стабилизира украинската економија, јавуваат тамошните медиуми.
Британскиот премиер Борис Џонсон, како и полскиот Матеуш Моравјецки, го посетија Киев во текот на вчерашниот ден и ја дадоа својата поддршка на Зеленски.