За Северна Македонија е важно да влезе во системот за политичко одлучување преку Европскиот парламент и Советот за министри што поскоро, рече вицепремиерот Маричиќ
Постојат идеи кои се презентирани од некои организации, аналитичари и тинк-тенкови особено од Париз и Виена. Има поединци кои ја промовираат идејата да се даде поскорешен датум за членство на државите од Западен Балкан, но со одредени нетипични дерогации. Одредени права да им бидат замрзнати првите пет или 10 години, како правото на вето или правото на комесар, истакна вечерва вицепремиерот за европски прашања Бојан Маричиќ во емисијата „Аргумент плус“ на ТВ 24.
Тој нагласи дека тоа е идеја за која вреди да се разговара, бидејќи за Северна Македонија е важно да влезе во системот за политичко одлучување преку Европскиот парламент и Советот за министри што поскоро.
„Правото на вето и правото да се избира комесар од кај нас дури и да дојдат подоцна не е страшен проблем, бидејќи секако на државите им требаат пет до десет години да се социјализираат во тој нов систем. Ние сакаме да станеме дел од ЕУ заради прифаќањето на тие вредности и стандарди, влез на заедничкиот пазар и учество во крупните одлуки“,
рече Маричиќ.
Според вицепремиерот подобро е да сме на маса, отколку да чекаме уште 10 години за ЕУ да се реформира и секако да ги немаме тие права.
Тој потенцираше дека не може да велиме дека сме за ЕУ, а да не носиме одлуки за тоа.
„Ние треба да сфатиме дека не е возможно да притискаме на кочница и на гас во исто време. Не може да велиме дека сме за ЕУ, а да не ги носиме одлуките кои не носат таму. Колегите од опозицијата мора тоа да го прифатат и да изберат. Оваа година е клучна за расчистување на овие дилеми“,
посочи Маричиќ.
Тој додаде дека не е возможно, искрено и чесно да се тврди дека сте за членство во ЕУ, но „под наши услови бидејќи ниту една држава не влегла под свои услови“.
„Имаме договор кој ни гарантира брз почеток на наредната фаза од преговорите, што потоа ќе покаже дека во однос на многу прашања сме понапред дури и од држави кои преговараат 10 години“,
рече вицепремиерот за евроинтеграции.
Тој кажа дека парламентарните избори немаат никаква врска со уставните измени и дека двотретинското мнозинство е потребно за државата да оди напред, а не за Владата.