Според Маричиќ, тоа што е важно и позитивно е што Франција има поамбициозна и појасна политика кон Балканот во последните години, за разлика од претходно, кога „темата за проширување често ја избегнуваше“
Вицепремиерот за европски прашања, Бојан Маричиќ изјави оти напорите на францускиот претседател Емануел Макрон во однос на пристапот на земјите од Западен Балкан кон ЕУ се искрени, но „тоа не значи дека проблемите ќе ни ги реши некој друг“.
„Франција е многу важна држава-членка на ЕУ без која не може да се утврди крупна политика во проширувањето, тоа го видовме и осетивме на своја кожа во 2019 година. Сметам дека напорите на претседателот Емануел Макрон се искрени. Тие помагаа и досега, заедно со Германија и други фактори, но тоа не значи дека проблемите ќе ни ги реши некој друг, туку дека треба да имаме амбиент во кој ќе имаме европско решение базирано на европски вредности“,
изјави вицепремиерот за европски прашања, Бојан Маричиќ во „Утрински брифинг“.
Според Маричиќ, тоа што е важно и позитивно е што Франција има поамбициозна и појасна политика кон Балканот во последните години, за разлика од претходно, кога „темата за проширување често ја избегнуваше“.
Маричиќ, исто така, најави дека во текот на денот заедно со премиерот Ковачевски, ќе имаат средба со францускиот амбасадор, а наскоро ќе замине и во посета на Париз со министерот Османи, за дискутирање на нивните приоритети и како Франција може да помогне во овој процес.
Вчера, францускиот претседател Емануел Макрон во својот говор пред Европскиот парламент во Стразбур ги претстави приоритетите на француското претседателство со ЕУ и уште еднаш нагласи дека, Западен Балкан „според својата географија и историја, како и преку ветувањето за иднината што го носи, се во срцето на европскиот континент, носи лузни кои не потсетуваат и на несигурноста на мирот и на силата на нашата унија“, јави МИА.
„Затоа денеска и ние имаме вокација да знаеме како да ги преиспитаме нашите односи со земјите од Западен Балкан и да им дадеме на појасен и почитлив волонтаристички начин искрени изгледи за членство“,
рече Макрон.
Во однос на посетата на бугарскиот премиер Петков на Скопје, Маричиќ вели дека дава нов импулс и енергија на односите, и оттука може само да одиме во нагорна линија.
Тој истакна и дека од државен интерес е час поскоро да се тргне ветото од страна на Бугарија, но тоа не треба да се прави по секоја цена, исто така, додавајќи дека решението мора да биде такво во кое Северна Македонија ќе биде уважена и ќе имаме исход кој ни одговара нам и ќе биде поддржан од нашиот Устав.