Веќе сме во комуникација со министрите за европски прашања од целиот регион за да составиме едно заедничко писмо кое ќе го испратиме до Европската комисија и државите членки на ЕУ со што ќе бараме одложување на таа одлука или изземање од таа одлука на државите кои преговараат со ЕУ, вели вицепремиерот за европски прашања
Вицепремиерот задолжен за европски прашања, Бојан Маричиќ и министрите за европски прашања од земјите од Западен Балкан ќе бараат од Европската Унија (ЕУ) да ја одложи одлуката за примена на Европскиот систем за овластување за патување (ЕТИАС), според која граѓаните на земји кои не се членки на ЕУ, а имаат безвисен режим, од 2023 година ќе треба да плаќаат по седум евра за влез во Унијата.
Маричиќ, во вечерашното гостување во дневникот на Сител ТВ рече дека не станува збор за враќање на визите, туку за процедура која бара регистрација и плаќање на седум евра и важи три години.
„Меѓутоа ние сметаме дека не треба да се воведе и можам да ви најавам дека веќе сме во комуникација со министрите за европски прашања од целиот регион за да составиме едно заедничко писмо кое ќе го испратиме до Европската комисија и државите членки на ЕУ со што ќе бараме одложување на таа одлука или изземање од таа одлука на државите кои преговараат со ЕУ“,
наведе Маричиќ.
Европската комисија е можно да го прифати таквото барање, смета вицепремиерот за европски прашања, бидејќи, како што нагласи, ЕУ е должна да внимава на овие работи.
„И во таа смисла мислам дека граѓаните имаат вистинско чувство дека тоа е непотребно, но и ние мислиме дека е непотребно во оваа фаза. Западен Балкан направи многу за Европската Унија и мислам дека треба во најмала рака да се одложи оваа одлука. Ние како Влада на Северна Македонија, со сите влади во регионот ќе направиме се да ја убедиме ЕУ да ја одложи оваа одлука“,
истакна Маричиќ.
Македонските граѓани во моментов можат да патуваат во европската Шенген-зона без виза или какво било претходно овластување, но од 2023 година тоа повеќе нема да биде можно без поднесување онлајн барање преку Европскиот систем за овластување за патување (ЕТИАС).
Според првите планови, ЕТИАС требаше да профункционира веќе во јануари, потоа беше продолжен до мај 2023 година, но сега се очекува имплементацијата на тој систем да започне во ноември следната година, што беше објавено и на официјалната веб-страница на Европската Унија.
Кога ЕТИАС ќе стане оперативен, формуларот за онлајн апликација ќе се достави на официјалната веб-страница на ЕТИАС или на мобилната апликација, која треба да биде пуштена во употреба. Апликацијата за патување ќе треба да се пополни најдоцна 96 часа пред датумот на патување и мора да содржи адреса на е-пошта, детали за пасош и лични податоци.
Последниот чекор е да се плати таксата за аплицирање од седум евра, со кредитна или дебитна картичка, за сите апликанти кои се над 18 и под 70 години. Малолетниците и лицата над 70 години ќе добијат ЕТИАС бесплатно.
Со воведувањето на системот граѓаните на земјите од регионот, како и на С Македонија ќе мора да имаат ЕТИАС за влез во следните 30 земји: Австрија, Белгија, Бугарија, Хрватска, Кипар, Чешка, Данска, Естонија, Финска, Франција, Германија, Грција, Унгарија, Исланд, Италија , Летонија , Лихтенштајн, Литванија, Луксембург, Малта, Холандија, Норвешка, Полска, Португалија, Романија, Словачка, Словенија, Шпанија, Шведска и Швајцарија. На граѓаните ќе им треба ЕТИАС и за да ги посетат европски микродржави со отворени граници Монако (преку Франција), Сан Марино (преку Италија) и Ватикан (преку Италија).