Вицепремиерот за економски прашања Бојан Маричиќ посочи и дека сè до настанот во Битола, каде што се отвори бугарскиот клуб, текот на разговорите помеѓу двете страни бил со достоинство и на ниво на партнери и НАТО-сојузници и додаде оти е важно да не преовладаат национализмот и радикализмот и да не дојде до промена на наративот
Во одредени кругови во Бугарија има некакви тези за македонскиот идентитет, но и 100 години да трае процесот не може да има ефект на промена на идентитетот, изјави вицепремиерот за економски прашања Бојан Маричиќ во „Утрински брифинг“.
Тој истакна дека ние знаеме кои сме и што сме и знаме оти нацијата не се создава или брише со одлука и додаде дека тоа не може да биде целта во 2022 година и во 21 век.
Вицепремиерот за економски прашања посочи и дека се до настанот во Битола, каде што се отвори бугарскиот клуб, текот на разговорите помеѓу двете страни бил со достоинство и на ниво на партнери и НАТО-сојузници.
„Важно е да не се остави да се променат атмосферата и наративот. Да не дозволиме да преовладаат национализмот и радикализмот“,
рече Маричиќ.
Маричиќ во своето излагање додаде дека со Бугарија се работи интензивно во повеќе области, и преку работните групи и на највисоко политичко ниво, додавајќи оти сите прашања се на маса, но останува да се види дали ќе се успее да се постигне договор и да се подигне ветото.
Вицепремиерот истакна дека ние сакаме да продолжиме во една пријателска насока, но со цел да се најде решение, да се тргне ветото, повторно без врзување за датуми, оти во спротивно јазот може само да се зголемува и да се продлабочува.
„Трпението на двете страни ќе биде сигурно намалено, ентузијазмот за решавање исто така. Ние не се откажуваме од членството во ЕУ, не се откажуваме од реформите, не се откажуваме од желбата Северна Македонија да биде членка на ЕУ и европска држава со сите стандарди. Тоа е таа агенда од која оваа влада нема никогаш да се откаже. Тоа не значи дека сме подготвени на какво било решение, на решение кое би го нарушило нашето достоинство, идентитет и нашите интереси“,
нагласи Маричиќ.