Министерот за информатично општество и администрација, Дамјан Манчевски, на денешната прес-конференција го презентираше извештајот за вработените во јавниот сектор за 2019 година, според кој, бројката изнесува 132 900 лица.
„Вработените се распоредени во 1 324 институции. Од вкупниот број, 20 169 се вработени во МВР, Армијата, Агенцијата за разузнавање, Агенцијата за национална безбедност и Управа за финансиска полиција. Поради безбедносни причини овие податоци, освен како бројка, во извештајот не се детално обработени. Но, во извештајот има детална анализа за остатокот од вработените во јавниот сектор“,
рече Манчевски.
Сепак, напомена министерот, во оваа статистика важно е да се направи разлика помеѓу органите на државната власт или тоа што ја претставува јавната администрација и остатокот од јавниот сектор, како училиштата, болниците…
„Бројот на вработени во државната власт изнесувал 16 522 лица, наспроти вкупната бројка на вработени. Тоа значи дека со статус на јавна администрација се овие 16 522 лица. Ова е со други зборови централната власт“,
рече Манчевски.
Според извештајот, најголем дел од 132 900-те вработени во јавниот сектор се во дејностите образование – 32 проценти и здравство – 18 проценти.
Манчевски ги прозва ВМРО-ДПМНЕ и КСС дека шират лажни вести
Во споредба со 2018 бројот на вработени во јавниот сектор е зголемен за 832 лица односно за 0,6 проценти. Но, според Манчевски, лани зголемувањето е во однос висококвалификуван кадар во јавниот сектор.
„Поточно, во однос на 2018 зголемен е бројот на вработени со високо образование за 932 лица, за 229 магистри и за 23 доктори на науки“,
рече министерот.
Кога станува збор, пак, само за администрацијата, на ниво на сите органи во состав на министерството бројот се намалил за 72 лица.
„Ова значи дека новите вработувања се прават согласно потребите на институциите и се вработуваат лица кои се со високо образование и во служба на сите граѓани. Ова значи и дека опозицијата подобро е да ги почека официјалните извештаи и бројки наместо да се занимава со шпекулации и ширење на лажни вести“,
рече Манчевски.
Тој ја прозва и Конфедерацијата на слободни синдикати (КСС). Таа денеска излезе со соопштение во кое наведе неофицијални бројки дека во последните две години има околу 24 000 нововработени во јавната администрација преку договори на определено време и преку агенциите за привремено вработување, алудирајќи дека ова доаѓа во време кога власта најавува трансфер од јавен во приватен сектор.
„Имав прилика да го видам соопштението од Конфедерацијата и можам да кажам дека се работи за класични лажни вести. Со ова последно соопштение и со речникот кој го користеа, се покажа дека станува збор за синдикална организација која е дел од мрежата на ширење на лажни вести, а каде изворот за ширење е ВМРО-ДПМНЕ“,
рече Манчевски.
Ангажираните преку агенциите за привремено вработување не влегуваат во статистиките
Инаку, во статистиките за вработениот сектор не влегуваат лицата кои се ангажирани преку агенциите за привремено вработување бидејќи тие немаат статус на вработени во јавниот сектор. Оваа бројка, според министерот, во 2019 изнесувала 3 222 лица.
Исто така, составен дел на извештајот не се ниту вработените во акционерските друштва во целосна државна сопственост. Иако немаме законска обврска да ги анализираме, рече Манчевски, сепак ги објавуваме и тие бројки. Така, во овие друштва бројот на вработени лани изнесувал 8 800 лица (8 545 на неопределено време, 83 на определено и 172 ангажирани преку агенциите за привремени вработувања).