Манасиевски го повика Јавното обвинителство да поведе постапка против Битиќи
Кои се тие класифицирани информации што му се украдени и како се нашле во негов посед – е прашањето што владејачката ВМРО-ДПМНЕ го упати денеска до пратеникот од СДСМ Фатмир Битиќи откако пред неколку дена имаше информација дека крадци упаднале во неговиот дом.
Валентин Манасиевски, член на ЦК на ВМРО-ДПМНЕ на денешната прес-конференција побара одговор и за тоа дали станува збор за највисоки државни тајни и како и зошто истиот тој ги чувал во својот дом.
„Фатмир Битиќи во изјава за медиуми во врска со грабежот во неговиот дом кажа дека му е одземена папка со класифицирани документи. Државните функционери немаат право да ги изнесуваат државните тајни и класифицирани документи од институциите во кои тие се наоѓаат и каде се заштитени“,
рече Манасиевски.
Тој побара од Социјалдемократскиот сојуз на Македонија и од пратеникот Битиќи да ги известат органите за каков вид на документи станува збор.
Манасиевски го повика Јавното обвинителство да поведе постапка против Битиќи.
„СДС да каже дали изнесувањето на класифицирани информации од институциите со кои управувале е партиска пракса и насока. СДС и Фатмир Битиќи мора да им кажат на граѓаните дали Македонија е загрозена со кражбата на документи кои Фатмир Битиќи не смеел да ги чува во свој посед“,
додаде Манасиевски.
Во вторникот дел медиуми на албански јазик објавија дека за време на продолжениот викенд крадци упаднале во домот на поранешниот потпретседател на СДСМ и актуелен пратеник Фатмир Битиќи.
Битиќи ја потврди информацијата, но не сакаше да изнесува детали.
Од МВР потврдија дека се случила кражба, но не прецизираа што било украдено.