Францускиот претседател додал дека меѓу Бајден и папата Франциск постои доверба и дека папата би можел да влијае во ангажманот на САД за пронаоѓање мировно решение за Украина
Францускиот претседател Емануел Макрон побара од поглаварот на Римокатоличката црква, папата Франциск, да ги контактира рускиот претседател Владимир Путин, патријархот на Руската православна црква и претседателот на САД, Џо Бајден, со цел да се поттикне мировниот процес во Украина.
„Го охрабрив папата Франциск да го повика Владимир Путин и московскиот патријарх Кирил, но и Џо Бајден“,
изјавил Макрон за францускиот весник „Ле поинт“ по средбата со папата во Ватикан, пренесува Ројтерс.
Макрон рекол дека е потребно и САД да седнат на маса за да го промовираат мировниот процес во Украина.
Францускиот претседател додал дека меѓу Бајден и папата Франциск постои доверба и дека папата би можел да влијае во ангажманот на САД за пронаоѓање на мировно решение за Украина.
Францускиот претседател во понеделникот се сретна со папата во Ватикан, што е нивна трета средба откако Макрон стана претседател на Франција во мај 2017 година.
Инаку, вчера поглаварот на Римокатоличката црква Папата Франциско ја спореди моменталната светска ситуација со кубанската ракетна криза пред 60 години, додека ги предводеше светските верски водачи во мирен апел до политичарите да ја спречат заканата од нуклеарна војна поради Украина.
Во римскиот Колосеум, Франциск ја предводеше церемонијата на затворање на тридневната конференција организирана од италијанската заедница Сант Еџидио, светска мировна и хуманитарна група.
„Денес, всушност, постои директна закана од нешто од кое се плашевме и се надевавме дека никогаш повеќе нема да го слушнеме: употребата на атомско оружје, кое продолжи да се произведува и тестира и по Хирошима и Нагасаки“,
рече папата Франциск, осврнувајќи се на можноста од употреба на нуклеарно оружје во Украина.
Папата Франциск потсети како на 25 октомври 1962 година, во екот на кубанската ракетна криза, папата Јован Дваесет и трети испрати радиопорака во која ги повикува тогашните лидери да го вратат светот од работ на конфликт.
„Денес мирот е сериозно загрозен, напаѓан и прегазен и тоа во Европа, токму на континентот кој во минатиот век ги претрпе ужасите на двете светски војни“,
рече Франциск.