Телеграм е шифрирана апликација, има близу милијарда корисници и е особено влијателна во Русија, Украина и во републиките од поранешниот Советски Сојуз
Павел Дуров, основачот на апликацијата за пораки Телеграм, роден во Русија, е уапсен во Франција како дел од тековна судска истрага и апсењето не е политички мотивирано, изјави денеска францускиот претседател Емануел Макрон.
Објавата на Макрон на социјалната мрежа Икс е прва официјална потврда за апсењето на Дуров речиси два дена откако тој беше приведен на аеродромот „Бурже“ во близина на Париз, веднаш по слетувањето со приватен авион од Азербејџан.
Отсуството на официјална потврда доведе до шпекулации за причините за притворот. Макрон рече дека прочитал „лажни информации за Франција по апсењето на Павел Дуров“.
„Апсењето на основачот на Телеграм на француска територија се случи како дел од тековна судска истрага. Ова во никој случај не е политичка одлука. Одлуката е на судиите“,
напиша Макрон.
Истрага за сторено кривично дело
Дуров има двојно државјанство, на Франција и на Обединетите Арапски Емирати, а беше уапсен како дел од прелиминарната полициска истрага за потенцијално дозволување широк спектар на кривични дела поради недостиг на модератори на Телеграм и недостиг на соработка со полицијата, изјави извор од француската полиција.
Дуров е роден во Русија и го основа Телеграм со својот брат во 2013 година.
Телеграм е шифрирана апликација, има близу милијарда корисници и е особено влијателна во Русија, Украина и во републиките од поранешниот Советски Сојуз.
Таа е рангирана како една од главните социјални мрежи по Фејсбук, Јутјуб, Ватсап, Инстаграм, Тик-ток и Ви чет. „Форбс“ го проценува богатството на Дуров на 15,5 милијарди долари.
Дуров во април изјави дека некои влади се обиделе да извршат притисок врз него, но тој верува дека апликацијата треба да остане неутрална платформа, а не „играч во геополитиката“.
Апсењето на извршниот директор на Телеграм го поттикна предупредувањето на Москва до Париз да ги признае неговите права и критиките од сопственикот на Икс, Илон Маск, кој рече дека слободата на говорот во Европа е нападната.
Телеграм: Дуров нема што да крие и често патува низ Европа
Во кусото соопштение објавено по полноќ по париско време, Телеграм не даде детали за апсењето, но рече дека компанијата со седиште во Дубаи ги почитува законите на Европската Унија и дека нејзиното управување со онлајн содржините е „во рамките на индустриските стандарди и постојано се подобрува“.
„Главниот директор на Телеграм, Павел Дуров, нема што да крие и често патува низ Европа. Апсурдно е да се тврди дека платформата или нејзиниот сопственик е одговорен за злоупотребата на таа платформа (…) Чекаме брзо решение за оваа ситуација. Телеграм е со сите вас“,
соопштија од Телеграм.