„ЕСМ продажба“ со јавноста сподели информација дека доставила покана за повикот за февруари до сите компании во Македонија што можат да испорачаат гас, но до денес, таква покана не е пристигната до „Макпетрол“. Како резултат на тоа, „Макпетрол“ одбива да биде набљудувач и покритие во тендери што очигледно фаворизираат еден учесник и затоа нема да поднесе понуда на јавниот повик за набавка на природен гас, велат од компанијата
„Макпетрол“ повеќе нема да учествува на јавните повици за набавка на природен гас бидејќи, како што посочуваат од компанијата, и покрај големите најави за либерализација на веќе либерализираниот пазар со природен гас, изминатиот период јавноста е сведок на фаворизирање на една компанија при набавката на гас.
Пресметките за јануарската набавка објавена од „ЕСМ продажба“ покажуваат дека севкупната понуда на „Макпетрол“ во моментот на поднесување беше пониска од таа на компанијата што беше избрана за победник на тендерот, додаваат од компанијата. Единствената разлика, велат од „Макпетрол“, била што цената на бугарската фирма не била фиксна, но дури и како таква, таа не донела никаква придобивка.
„Напротив, како резултат на движењата на светските берзи, за количините потребни за јануари, ‘ЕСМ продажба’ можеше да плати над милион евра помалку доколку се придржуваше до основните пазарни услови на функционирање, односно, ако цената на гасот беше променлива и директно поврзана со цената на берзите. Дополнително, ‘ЕСМ продажба’ со јавноста сподели информација дека доставила покана за повикот за февруари до сите компании во Македонија што можат да испорачаат гас, но до денес, таква покана не е пристигната до ‘Макпетрол’. Како резултат на тоа, ‘Макпетрол’ одбива да биде набљудувач и покритие во тендери што очигледно фаворизираат еден учесник и затоа нема да поднесе понуда на јавниот повик за набавка на природен гас“,
се наведува во соопштението на „Макпетрол“.
Што се однесува до редовните потрошувачи на „Макпетрол“, снабдувањето ќе продолжи непречено како и досега. За февруари за нив ќе биде обезбеден гас по цена пониска за најмалку 30 проценти споредено со цената во јануари, нагласуваат од компанијата.
На почетокот на јануари, АД Електрани на Северна Македонија, во врска со постапката со која ЕСМ ја прифати понудата со фиксна цена на „Балкан Јутилитис“, а ја одби онаа на „Макептрол“ со променлива во зависност од движењата на берзата, соопшти дека бугарската фирма „Балкан Јутилитис“ понудила пониска цена за набавка на природен гас од онаа која ја понудил „Макпетрол“ во моментот кога се носела одлуката за избор на најповолна понуда за јануари 2023 година.
Во моментот на избор на најповолна понуда за набавка на природен гас за јануари, како што посочија од ЕСМ, „Балкан Јутилитис“ понудил 115,97 евра за мегават час, а понудата на „Макпетрол“ била 116,20 евра за мегават час.