Во моментот на избор на најповолна понуда за набавка на природен гас за јануари, како што посочија од ЕСМ, „Балкан Јутилитис“ понудил 115,97 евра за мегават час, а понудата на „Макпетрол“ била 116,20 евра за мегават час
Бугарската фирма „Балкан Јутилитис“ понуди пониска цена за набавка на природен гас од онаа која ја понуди „Макпетрол“ во моментот кога се носеше одлуката за избор на најповолна понуда за јануари 2023 година.
Ова денеска го соопштија од АД Електрани на Северна Македонија во врска со постапката со која ЕСМ ја прифати понудата со фиксна цена на „Балкан Јутилитис“, а ја одби онаа на „Макептрол“ со променлива во зависност од движењата на берзата. Во моментот на избор на најповолна понуда за набавка на природен гас за јануари, како што посочија од ЕСМ, „Балкан Јутилитис“ понудил 115,97 евра за мегават час, а понудата на „Макпетрол“ била 116,20 евра за мегават час.
„На коментарите во врска со намалената цена на природниот гас за јануари, би сакале да нотираме дека доколку ‘Макпетрол’ во месец декември имаше сознанија дека цената за јануари ќе има тенденција на спуштање, требаше истите да ги пренасочи кон понудата и да даде понуда со пониска фиксна цена, која ЕСМ ‘Продажба’ ќе можеше да ја земе предвид за разгледување заедно со другите понудувачи кои доставија фиксна цена“,
посочуваат од ЕСМ.
Од компанијата додаваат дека на јавниот повик за набавка на природен гас за јануари и април кој беше спроведен минатиот месец, ЕСМ „Продажба“ ги навела задолжителните услови за секој понудувач како обезбедени количини, квалитет, фиксна цена и банкова/корпоративна гаранција.
„Фиксната цена е задолжителен услов од причина што ЕСМ ‘Продажба’ треба да има обезбеден буџет, да може да ја прифати понудата, да има пресметка за плаќање на природниот гас којшто го плаќа однапред и истиот да го испорача до другите потрошувачи кои ќе го купат од ЕСМ ‘Продажба’, со маржа не поголема од еден отсто“,
велат од ЕСМ.
Од копманијата додаваат дека во тековниот месец ЕСМ „Продажба“ ќе спроведе јавен повик за набавка на природен гас за февруари 2023 година на кој ќе бидат поставени истите услови. Оттаму ги повикаа сите лиценцирани фирми за трговија и снабдување со гас во земјата и странство, вклучувајќи ги и „Макпетрол“ и Пром-Гас да поднесат понуди кои ќе содржат што пониска фиксна цена.