Од Министерството за здравство (МЗ) информираат дека Европската комисија денеска го усвои националниот Дигитален сертификат на Република Северна Македонија за еквивалентен на Дигиталниот сертификат на ЕУ и со тоа нашите сертификати се први од регионот што се признаени од ЕУ.
„Ние сме прва земја во регионот за која сертификатите за КОВИД-19 ќе се сметаат за еквивалентни на Дигиталниот сертификат на ЕУ. Со ова се избегнуваат сите ограничувања во патувањата како што се дополнително тестирање или карантин. Во неопходни случаи, како што е заштитата на јавното здравје, земјите членки можат да преземат дополнителни мерки. Благодарение на оваа одлука ќе бидат укинати ограничувањата за патување за луѓето што ги примиле вакцините против Ковид-19 одобрени од ЕУ. Со оваа одлука се гарантира дека сертификатите за КОВИД-19 издадени од Република Северна Македонија ќе се сметаат за исти со Дигиталниот сертификат на ЕУ за КОВИД-19, а нашата земја официјално е поврзана со системот на ЕУ со сертификатот за КОВИД-19 издаден од нашите авторитети ќе биде прифатен во ЕУ под истите услови како и Дигиталниот сертификат за ЕУ. Во пракса, носителите на овие сертификати ќе можат да ги користат под истите услови како и носителите на ЕУ Дигиталниот сертификат за вакцинација“,
велат од Министерството за здравство.
Од МЗ нагласуваат дека одлуката на Европската комисија е признание за Република Северна Македонија за преземените активни чекори и дека ова е потврда за автентичноста и валидноста на чекорите што се преземаат со цел заштита на здравјето на нашите граѓани.