Во реакцијата на членовите на македонскиот тим се вели дека, и покрај јасно искажаните погледи и ставови на копретседателот од македонска страна дадени пред новинарите на 25 ноември по завршувањето на 22. средба, во одредени медиуми во изминатите три дена се пласираат информации и се емитуваат прилози со кои се шират невистинити дека Комисијата го решава црковното прашање на Македонската православна црква-Охридска aрхиепископија (МПЦ-ОА), дека дискутира за теолошки и црковни прашања, догми и канони или, пак одредува чија е ОА
Членовите на на македонскиот тим во Заедничката мултидисциплинарна и експертска комисија за историски и образовни прашања денеска со „разочарување“ реагираат на, како што велат, некоректното информирање на јавноста за темите кои беа предмет на дискусија во работата на Комисијата на дводневниот состанок што се одржа минатата недела во Скопје.
Во реакцијата на членовите на македонскиот тим се вели дека, и покрај јасно искажаните погледи и ставови на копретседателот од македонска страна дадени пред новинарите на 25 ноември по завршувањето на 22. средба, во одредени медиуми во изминатите три дена се пласираат информации и се емитуваат прилози со кои се шират невистинити дека Комисијата го решава црковното прашање на Македонската православна црква-Охридска aрхиепископија (МПЦ-ОА), дека дискутира за теолошки и црковни прашања, догми и канони или, пак одредува чија е ОА.
„Притоа, во правењето на овие прилози воопшто не е побарано мислење од членовите на Комисијата, а членови на Синодот на МПЦ-ОА, експертската јавност, политички партии и претставници на државни институции, се доведени во ситуација да даваат свое мислење и да легитимираат измислена и непостоечка тема само врз основа на неточни информации и паушални заклучоци“,
се вели во реакцијата на македонскиот тим во Мешовитата македонско-бугарска експертска комисија за историски и образовни прашања.
Оттаму, повторно појаснуваат дека предмет на работата на Комисијата се прашањата за претставувањето на историјата на Охридската архиепископија во учебниците по историја за основно образование во двете држави, нејзината улога и значење за христијанството и словенската писменост и книжевност, а не црковно-теолошки прашања или утврдување на статусот на МПЦ-ОА или, пак, нејзино дефинирање во национална смисла.
Ова не е прв пат, додаваат членовите на македонскиот дел во Комисијата, нејзината работа и решенија да бидат предмет на манипулација, на паушални и неаргументирани заклучоци со цел потоа да бидат злоупотребени.
„Повторно сведочиме како свесно се создаваат непостоечки проблеми и измислени закани по македонскиот идентитет со што јавноста се доведува во заблуда и се манипулира со нејзините чувства, особено со чувствата на македонскиот народ. Повторувањето на овие дезинформации во однос на работата на Комисијата ќе ги сметаме за свесно инструментализирање на нејзината работа со цел остварување на политички цели. Затоа, повикуваме на одговорност во информирањето на јавноста за работата на Комисијата не само од страна на медиумите, туку и од сите општествено-политички актери во македонското општество“,
апелираат членовите на македонскиот тим во Заедничката мултидисциплинарна и експертска комисија за историски и образовни прашања.